SHILLONG: Meghalaya a·dokni gitcham Chief Minister aro Trinamool Congress (TMC)-ni dilgipa Mukul Sangma, uni gitcham Congress party-ona re·bapilna skani dongode uko rimchaksona kusi ong·aigen ine Meghalaya Pradesh Congress Committee (MPCC)-ni president Vincent H Pala parakataha.
Mukul Sangma, Congress-ona re·bapilna sikgenchimode ua Tura-ni MP Saleng Sangma, MPCC-ni working president Deborah Marak aro gipin dilgiparang baksa agangrikchengna nanggen ineba Pala talataniko on·angskaaha.
“Mukul Sangma gita dakgipa dilgiparangko Congress dolo man·taigenchimode uamang kusi ong·begen,” ine Pala aganenba, Mukul-ni Congress-ona re·bapilaniko Congress-ni high command ra·chakchengna nanggen ine parakatskaaha.
Mukul Sangma-ni re·bapilanichi Congress dol aiao inmanbegipa kamrangko ka·na man·genchim ine janapatskaengon, “Ua (Mukul) Congress dolona re·bapilna gita maiko dakna nanga an·tangan ma·sia,” ine Pala aganaha.
Mukul Sangma aro uni gisepo maming neng·nikanirang dongja aro uamang sakgnian saksa sakgipinko mande ra·grikgiparang ong·a ine janapatengon, Congress party-de ua saksanni gam-jin ong·ja indiba pilaknin ong·a ine MPCC president parakataha.
“Congress dolko rikpiltaina gita chinga kamko ka·na nangenga,” ine ua aganaha.
Meghalaya a·doko Trinamool Congress (TMC)-ni dilgiparang, Congress dolona re·angpilna miksonganirang dongenga ine jangbingbanganirangko aro Meghalaya Pradesh Congress Committee (MPCC)-ni president Vincent H Pala-ba parakatani ja·man, iako a·dokni gitcham Chief Minister aro TMC-ni dilgipa Mukul Sangma raken jegalatskaahachim.
Congress dolona re·angpilna miksonganirang donga ine jangbingbanganirangko jegalatengon, ua Congress dolona re·angpilna miksonganiba dongja indiba nanggenchimode mikkangchi gital political dolko bikotani cholrang donga ine Sangma parakatahachim.
Meghalaya a·doko Congress dolde miksongani grisa re·mikkangenga ine janapatengon, manderangni mikkangode pangnan Congress dolni dilgiparang dingtang dake aganronga indiba janggilode NPP aro Congress dolni gisepo melie kam ka·ani donga ine TMC-ni dilgipa matnange aganahachim.
KHADC-o NPP aro Congress dolrangni bakrime kamko ka·engani gimin janapatskaengon, ua an·tangde a·dokko riknasa miksonganirang baksa kam ka·enga ine Sangma parakataha.
Ia kamni ning·o MPCC-ni president Vincent Pala jak dongama ine sing·anina aganchakaniko on·angengon, ua darangkoba miksonge aganenga ong·ja indiba ua da·o sorkariko chalaienggipa party-ni kosakosa chakatenga aro NPP baksa Congress-ba jak donga ine Sangma matnangataha.