SHILLONG: Adita salrangna skang, Mawlynnong gilja noko, ‘Jai Shri Ram’ ine a·bokanichi Kristianrangko chonnikani gita ong·ahani gimin social media influencer Akash Sagar-ko bakan rim·gen ine Sonibar salo, a·dokni Director General of Police (DGP) Idashisha Nongrang parakataha.
Dos dakgipa mandeko da·o dipet police-rang rim·kujaenga ine talataniko on·angengon, ia mande bano dongenga ukode police-rang ma·sienga ine DGP parakataha.
Meghalaya a·dokni Kristian olakkiram noko, Hindurangni dakbewalko aganahani gimin ia mandeko rim·genma ine sing·anina aganchakaniko on·angengon, ia a·selni bidingo police-rang nanga gita ja·kurangko de·enga ine DGP aganaha indiba uko rim·ani bidingo talbate agannade jechakskaaha.
Adita salrangna skangsan, social media influencer Akash Sagar, Mawlynnong-o donggipa gilja nokona re·angenba ‘Jai Shri Ram’ ine Hindurangni aganrongbewal kattako aganahachim aro iani bidingo Meghalaya a·dokni pilak biaprangon Kristianrangsan ong·aigija dingtang dingtang dolrangba, ia mandeni kosako raken jegalattokahachim.
Ia obosta ong·ani ja·man, a·doko songdongenggipa mitam manderang, ia mandeni kosako FIR ka·doangenba, ia mandeko ta·raken rim·china dabiangtokahachim.
Dos dakgipa mandeni kosako Meghalaya police, FIR-koba ka·aha.