SHILLONG: Re·baenggipa bilsio ong·atna sienggipa Higher Secondary School Leaving Certficate (HSSLC) porikka, district council election baksa apsan ong·engani gimin porikkako sena sienggipa chatro chatrirangni namgnina HSSLC porikkani tarikrangko ra·doatchina gita United Democratic Party (UDP), a·dokni Chief Minister Conrad K Sangma-na mol·mole sedoataha.
Iani bidingo, a·dokni Chief Minister Conrad Sangma-na seachi u·iatengon, HSSLC porikkako re·baenggipa February 10 tarikoni 21 tarikona ong·atna tik ka·ahani gimin ian district council election-na dingtang dingtang political dolrangni tarisamsoanio apsan ong·e porikkako sena sienggipa chatro chatrirangna neng·nikanirangko ra·banaba gnang ine UDP-ni president Metbah Lyngdoh parakataha.
Khasi Hills Autonomous District Council (KHADC) aro Jaintia Hills Autonomous District Council (JHADC) election-ko February 21 tariko ong·atna tik ka·manahani gimin ian HSSLC porikka baksa apsan ong·enga ineba Lyngdoh parakataha.
“HSSLC porikka aro district council election-na tik ka·gimin somoirang apsan ong·engani gimin dingtang dingtang manderangni badi ka·anirangko man·soenba anga, chatro chatrirang maming neng·nikanirangko chagrongna nangjana gita HSSLC porikkako gipin tarikrangona ra·doatskachina nang·ko mol·molatenga,” ine UDP-ni president, Chief Minister-na sedoatgipa chittio janapataha.
Indake ong·engon, KHADC aro JHADC election-na UDP-ni gnigipa candidate list-ko da·al December-ni 30 tariko jinmana parakatgen ine UDP-ni general secretary Jemino Mawthoh, kobor ra·timgiparangna u·iatskaaha.
Ia gnigipa list-o KHADC aro JHADC election-o susana sienggipa sak 10 candidate-rangko parakatgen ineba UDP-ni general secretary aganaha.
