Akash Sagar-ko ta·rake rim·enba bichalchina HYC dabia

SHILLONG: Adita salrangna skang, East Khasi Hills-ni Mawlynnong-o donggipa Gilja ge·sao ong·gija kamrangko ka·enba Kristian bebera·giparangko kal·stekani gimin saksa Hindu chadambe social media influencer Akash Sagar-ko ta·raken rim·china gita HYC dabiaha.
Uni daka kamrangara Kristian bebera·giparangko kal·stapa ga·aka ine matnangenba dosi dakgipa Akash Sagar-ko bakbak rim·e bichal ka·na nanga ine Hynniewtrep Youth Council-ni Central Executive Council raken dabiaha aroba uni ong·gija daka kamrangko raken jegalaha.
“Uni daka kamara Kristian bebera·giparangko kal·steke roasan ong·aija, indiba A·doko pilak jat aro toromrangni meli-nangrimaniko neng·nikataniona ra·bagen aro ian a·songo jelbatgipa jatni agenda ong·a jekon chinga ra·chakna man·ja,” HYC aganaha.
Dosi dakgipa mandeko aro un baksa dongpagipa manderangko ta·rake rim·e bichal ka·china Police Department-ko didiengon, ua uni kamrangni gimin niamo pangchake sastiko man·na nanga, jedakode mikkangchi indakgipa kamrangko Kristian bebera·giparangni kosako daktaijawa, ine HYC aganaha.
Unomitingo, a·doko songdonggipa manderangni jedakgipa torom bebera·aniba ong·chong uamangna tourist-rangchi saknaataniko ra·bajana gita a·dokona songrebaenggipa tourist-na awareness-ko on·china gitaba HYC, Sorkariko didiaha.