SHILLONG: Meghalaya a·dokoba bilsi gitalko manina manderang nichaksotokengon, December-ni 31 tarik walo maming a·sel ong·anirang dongjana gita a·dokni dingtang dingtang biaprango police-rang, chu ringe gari salgiparangko check ka·na ba nirikkina tik ka·angaha.
Pangna bilsian da·o gita Krismas aro bilsi gitalko maniani somoirango, manderang churing chupeke garirangko salrongani a·sel ramarango gari accident ong·anirangko aro manderangni sianirangko nikna man·rongachim.
Adita salrangna skangsan Krismasko maniani somoioba badiaba badiaba biaprango gari a·sel ong·anirangko nikna man·aha aro uandaken manderangni sianirangkoba nikna man·aha.
Indake ong·engon, da·o bilsi gitalko maniani somoio aro bilsi gitalko nichaksoani somoirango iandake gari a·sel ong·anirangko komiatna gita police-rang, ramarango manderangni chu ringe gari salaniko nirikkina tik ka·angaha ine u·iataha.
“Manderang roramengmiting somoio chu ringgen ong·ode, an·tangtang baksa chu ringgijagipa driver-ko rimbitchina. Indiba gariko salgipa manderang, churing chupeke salna man·jawa,” ine police official-rang parakataha.
Churing chupeke aro skatang gari salgipa manderangko rim·a man·genchimode rakgipa ja·kurangko de·gen ineba police official-rang, mikrakataniko on·angaha.
