SHILLONG: Re·baenggipa February 21 tariko ong·atna sienggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o chegipa ong·na gita United Democratic Party (UDP)-ni dilgiparang, grassroot worker ba onbatsranggipa gadango kam ka·e on·gipa manderango pangchakbatenga.
“UDP-o kam ka·giparangni bakrimani namen bilaka aro ia party, ru·uta somoirangonin dongaha. Unbaksana chingo sak 12 MLA-rang aro sak 12-13-mangni gita MDC-rangba donga. District aro constituency-ni gadangrango name kamrangko ka·anichi anga bebera·a chinga ia district council election-o chu·sokgipa ong·na man·gen,” ine UDP-ni general secretary Jemino Mawthoh parakataha.
Mawthoh-ni aganani gitade, MDC election-rangara MP election-rangoni namen dingtanga aro district council election-rangode songadam nokadamrango kam ka·gipa manderangosa pangchakbata.
“MDC election-rangode MP election-rango gita ong·gija, constituency aro grassroot-ni gadangosa pangchakbata. Uni gimin chinga, ia district council election-o chu·sokgipa ong·na chingni grassroot worker-rangon pangchakenga,” ine Mawthoh aganaha.
Kam ka·giparangni rakbee kam ka·anichi ia district council election-o UDP chu·sokgipa ong·gen ineba ua an·tangni ka·dongchakenganiko parakataha.
“Ia MDC election-o chingna cholrang nambatenga maina grassroot level-o chinga party-ko bilakbatatna man·aha aro pilak gadangrangon bakrime kamko ka·anichi chinga chu·sokgipa ong·na ka·dongenga,” ine UDP-ni general secretary aganaha.
Gipin political dolrang baksa susagrikani bidingo sing·on, “Chinga gipin party-rangni giminde aganna man·ja indiba UDP-ko 1997 bilsio bikotchengaonin chinga party-ko bilakroroatna gita rakbee kamrangko ka·aha. Ia party-ara songadam nokadamrango bilakbee bak donggipa party ong·a,” ine Mawthoh aganaha.
Mawthoh-ni aganani gitade, manderangni nangani aro neng·nikanirangko namatna gita UDP pangnan kamrangko ka·enga aro apsan daken mikkangchiba kamrangko ka·angkuna miksongenga.
District council-rangni daitorangko uamang pangnan party-ni membor-rangna u·iatna jotton ka·enga ineba Mawthoh parakataha.
“Chinga party-ni gita MLA-rang, MDC-rang aro dilgiparang baksa baditaba chang tom·anirangko ong·ataha aro adita salrangna skang general council tom·aniko ong·atanioba, KHADC aro JHADC-o UDP-n daitorangko jinmana talate on·angaha,” ine ua aganaha.
KHADC aro JHADC election-ko re·baenggipa February 21 tariko ong·atenba, result-rangko February 24 tariko parakna siengachim.
 |
ReplyForward
|
