SHILLONG: Je dilgiparangan Congress dolko wate katenba, National People’s Party (NPP)-o napangahachim, uandakgipa manderangni gisik ka·tong, Congress baksaan ong·kuenga ine Meghalaya Pradesh Congress Committee (MPCC)-ni president Vincent H Pala matnangataha.
“Deputy chief minister-rang aro adita sak minister-rangko man·chape NPP-o ong·enggipa bang·bata dilgiparangan Congress dolonisa ong·a. Ia manderang da·o NPP baksa bakrimengoba uamangni gisik ka·tongde Congress baksaan ong·engkua,” ine Pala aganaha.
Congress dolni bang·a MLA-rang aro MDC-rang, NPP-o napangtokahani gimin ua ia kattarangko aganaha.
Congress dolko NPP-ni ‘Team B’ ine matnanganina aganchakaniko on·angskaengon, “Je manderangan Congress dolko NPP-ni ‘Team B’ ine matnangengachim, ia apsan manderangan Congress dolko wate katgiparang ong·a,” ine MPCC-ni president parakataha.
Khasi Hills Autonomous District Council (KHADC)-o NPP baksa bakrime, Legislative Assembly-ode Opposition ong·e dongskaahani gimin Congress dol matnanganirangko man·ahachim ine nikna man·a.
Adita salrangna skangmangmangsan Congress dol, KHADC-o NPP-chi dilenggipa Executive Committee-o bakrimaoniko ra·pilahachim aro iani giminba Congress dolko, KHADC aro JHADC election-na skang ‘dake mesokani’ ine matnangtokskaahachim.
