TURA: West Garo Hills a·jani Albella Chidekgre-o British Magnetic Pillar songgipa biapo niam gri a·arangko cho·enga ine Garoland State Movement Committee (GSMC) parakatenba, ia pillar ba krongko ia jolrango songdongenggipa manderangni namgnina chel·chakchina gita a·songni President Droupadi Murmu-ko didiataha.
Iani bidingo a·songni President Droupadi Murmu-na seachi u·iatengon, ia British Magnetic Pillar-ko chengo British-rangni sason ka·miting somoirangon songahachim indiba da·o ia krongni wilwilao niam gri a·arangko cho·enganiara, mikkangchi ia krongko nisie galani gita ong·gnok ine GSMC-ni dilgiparang parakataha.
“Iandake ia British Magnetic Pillar-ni wilwilao donggipa biaprangko cho·aniara dongimin niamrangko pe·anisan ong·jaenga indiba gisik ra·na krabegipa aro jolo songdongenggipa manderangni namgnina songe dongipa krongko nisie galaniba ong·enga. Ia krongara British-rangni somoio songe donanggipa krongsa ong·a aro ia krongko chasongnan ripingangkuna nanga. Uni gimin ia biapni wilwilao niam gri cho·anirangko champengatchina aro ia krongko chel·chake rakkichina chinga nang·ko mol·molenga,” ine GSMC-ni dilgiparang, a·songni President Droupadi Murmu-na seatgipa chittio parakataha.
GSMC-ni President-na sedoatgipa chittio janapatani gitade, ia British Magnetic Pillar-ara wachini somoirango, mikka kimpretani aro goera goanirangko chel·chakgipa krongba ong·a aro ian wachini somoirango songni nokni manderangna chel·chakaniko on·enggipaba ong·achim.
“Uni gimin ia krongara ia jolrango songdongenggipa manderangna namen nangchongmotgipa gita ong·enga aro iako je cholchiba chel·chake rakkina nangchongmotenga,” ine GSMC-ni dilgiparang parakataha.
GH-ni British Magnetic Pillar-ko chel·chakchina a·songni Prez-ko GSMC didia
Date:
Share post:
