TURA: West Garo Hills a·jani Albella Chidekgre-o British Magnetic Pillar songgipa biapo niam gri a·arangko cho·enga ine Garoland State Movement Committee (GSMC)-ni matnanganiko saksa social acitivist aro Albella Chidekgre a·kingni saksa chra-pante Nilbath Ch Marak jegalatenba, iandake Maharini a·king ning·o donggipa biapni bidingo songbadrango matnange seatahani gimin kema bi·china dabiangaha.
Albella Chidekgre-o British Magnetic Pillar songgipa biapo niam gri a·arangko cho·enga ine salsa skangsan GSMC matnangatenba, ia pillar ba krongko ia jolrango songdongenggipa manderangni namgnina chel·chakchina ine a·songni President Droupadi Murmu-na sedoatahachim.
Ia British Magnetic Pillar-ko chengo British-rangni sason ka·miting somoirangon songaha indiba da·o ia krongni wilwilao niam gri a·arangko cho·enganiara, mikkangchi ia krongko nisie galani gita ong·gnok ine GSMC-ni dilgiparang President-na sedoatgipa chittio janapatahachim.
Iandake songbadrango seataniko jegalatskaengon, ia biapara Chambugong Maharini a·asa ong·ani gimin pilak kamrangan Nokmani ning·osa ga·aka aro ia a·kingo maiba kamrangna a·arangko cho·na nanggenchimoba gipin dolrang iano jak on·pana gita maming bil dongja ine Chambugong Maharini Chra-Pante Nilbath Marak parakataha.
Ia biapo sorkarini maiba nok ba krongrang donggenchimoba iarangko sorkari officer-rangsa nie nanga gita a·kanganirangko dakna man·gen ineba Marak parakataha.
“Uni gimin an·tangtangni man·gnina chanchie gipin Maharirangni a·a ba biaprangni bidingo matnange seatgipa manderangni kosako anga raken jegalenga aro iani bidingo uamangko kema bi·china dabienga,” ine social activist Nilbath Marak parakataha.
