SHILLONG: Da·o dipet Garo Hills-o Congress MLA-rang saksaba dongjahaoba, Garo Hills Autonomous District Council (GHADC) election aro 2028 bilsini Assembly election-na party-ko bilakbatatna gita kamrangko da·onin ka·sona a·bachengskaengaha.
“Oe beben da·o dipet chingni party-o Garo Hills-oni MLA-rang saksaba dongjaha indiba uan mamingba ong·ja maina gitcham MLA-rangoni bang·en ching baksa bakrimeaha aro uamangba da·o party-ni nanganirangna daitorangko ra·na a·bachengaha. Mikkangchi ong·na sienggipa election-rango susana gita an·tangtangko tarisamsoenggipa candidate-rang chingo bang·en donga,” ine Meghalaya Pradesh Congress Committee (MPCC)-ni president Vincent H Pala aganaha.
2026 bilsio ong·atna sienggipa GHADC election aro 2028 bilsio ong·atna sienggipa Assembly election-o susana tarisoenggipa candidate-rangko ua grongaha ineba Pala parakataha.
“Chinga gisiko nangen kamrangko ka·soengaha aro adita salrangna skangsan anga GHADC election aro Assembly election-o susana tarisoenggipa candidate-rangko gronge Garo Hills-oni re·bapilaha. Uni gimin chinga pilakni gitan party-ko bilakbatatna kamrangko ka·chichaengaha,” ine MPCC-ni president aganaha.
Chi banani somoirango aro manderangni neng·nikanirangko man·engmiting somoirango Congress dolni membor-rang, pangnan manderangna dakchakanirangko on·na jotton ka·enga ineba ua aganaha.
Re·anggipa 2024 bilsini April jao, Tura-ni gital MP-na seokako man·e, Gambegre-ni gitcham MLA Saleng A Sangma, an·tangni MLA ong·aoniko watangani ja·man da·o Garo Hills-o Congress dolni MLA-rang saksaba dongjaha ine nikna man·enga.
