SHILLONG: Re·baenggipa February jani 21 tariko ong·atna sienggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o susana gita a·dokni Congress dol, gital candidare-rangna party tikitrangko on·na miksongenga.
Iani bidingo kobor ra·timgiparangna u·iatengon, MLA election-rangni ja·man gital politician-rangko tarina nangengani gimin Congress dolna bang·en ku·pattianirangko on·tokaha ine Congress dolni dilgipa Manuel Badwar parakataha.
“Chinga qualify ong·gipa candidate-rang, jemangan a·dokna aro a·dokni manderangn dangdike on·na man·gen, uandakgipa candidate-rangko man·a dipet rimbana jotton ka·enga. Ia district council election-o Congress dol, gital candidate-rangna cholrangko on·na nangnikenga,” ine ua aganaha.
Badwar-ni aganani gitade, Legislative Assembly ba District Council-ba ong·ja maina, Congress dol, a·dokko chalaiani bewalko dingtangatna gita gital chanchiani aro u·ianirangko ra·bana jotton ka·enga.
Gital candidate-rangni susaanio chegipa ong·genchimoba ba amako man·genchimoba maming ong·ja maina electoral politics-de dongaikugen ine Laitumkhrah-Malki constituency-oni susaenggipa Manuel Badwar aganaha.
Indake ong·genchimoba constituency chu·gimikode gital candidate-rangko susaatjawa ine ua talataniko on·angskaaha.
Ia district council election-o gital aro gitcham candidate-rangko apsan susaatanichi Congress dolna cholrangko nambatatgen ineba Badwar aganaha.
“Iachi District council politics-o chinga dingtanganiko ra·bana man·gen ine ka·dongenga,” ine ua aganaha.
Sing·anina aganchakaniko on·angkuengon, “Bang·bata manderangan Congress dolko dingtanganiko ra·bana aro namgipa sorkariko ong·atna ka·dongtoka. Manderang chingna pu·onna pu·onjade maming ong·ja indiba manderangni gisiko pangnan Congress dol dongkamaia,” ine Badwar aganaha.
 |
ReplyForward
|
