SHILLONG: Re·baenggipa February jani 21 tariko ong·atna sienggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-o susana dorgasto galgipa sak 10 candidate-rangko Bharatiya Janata Party (BJP)-ni dilgiparang nipilna a·bachengataha.
“KHADC aro JHADC election-na ching asak 10-na baten dorgasto galgiparangko man·soaha aro ia candidate-rangko nipilna gita chingni state election committee (SEC) baksa tom·aniko ong·atgen,” ine BJP-ni state spokesperson Mariahom Kharkrang parakataha.
KHADC aro JHADC-ni pilak constituency-rangode BJP susajawa indiba manderangni chakpaani aro candidate-rangni chenagipa constituency-rangko seokesa susaaigen ineba Kharkrang talataniko on·angaha.
Songadam nokadamrango manderangni chakpaanirangko BJP man·enga ine janapatengon, ia election-na BJP-ni candidate-rangko manderangni nangnikani krisa seokgen ine Kharkrang parakataha.
MDC election-na BJP-ni tarisamsoanirangko janapatengon, “Angni nikaniode an·ching pilak election-rangon susana nangaia maina election-rango susaanichisa party-na kam ka·enggiparangba party-ni kamrango bak ong·e dongna man·a. Tarisamsoani ja·man rang·san an·ching election-o susajana tik ka·aia ong·ode party-na kam ka·giparangara bachi re·angskagen? Uamang cholgri ong·e dongaignok, uni gimin an·ching party ong·e pilak election-on susana nangaia,” ine BJP Meghalaya-ni ku·wattimgipa aganaha.
Re·anggipa bilsini Lok Sabha election-ode BJP, Meghalaya a·doko susagija apsan bakrimenggipa National People’s Party (NPP)-nasa chakpaaniko on·skaahachim ine nikna man·a.