SHILLONG: Capt Williamson Sangma State University-ko re·baenggipa January-ni 13 tariko, dingtangmancha Kristianrangni bewalo jinma bi·anichi pakwate on·anggen ine a·dokni Education Minister Rakkam A Sangma-ni parakatani ja·man, toromni bimingo ‘politics’ kal·jachina aro a·doko lekka porako nambate on·na gisik on·batchina gita Sein Niamtre Ki Khynnah Purea Shillong (Niamtre chatro chatrirangni dol), Education Minister-ko didiataha.
“Education Minister-ni agananio, Meghalaya a·dokko Kristian a·dok ine a·kanganiara India a·songni a·dok ong·aniko dingtangatani ong·aha maina a·songni niam bidikon a·songni pilak a·dokrangkon jakgitelgipa aro dingtang dingtang jat aro toromni biap ine mesokani donga. Kesavanada vs State of Kerala (AIR 1973 S.C. 1461) aro Indira vs Rajnarain (AIR 1975 S.C. 2299)-o Supreme Court-ni rai on·anion, darang a·dokba torom aro jatko dingtangatani dongna nangjawa ine u·iatmanaha. Iani ortode darang a·dokan an·tangtangni torom dongna man·ja,” ine Niamtre chatro chatrirangni dol parakataha.
Meghalaya a·dokko Kristianrangni a·dok ine darangba mingna bil dongja ine janapatengon, mikkangchi iandakgipa kattarangko aganjachina aro toromni biming politics kal·jachina gita Niamtre chatro chatrirang, a·dokni Education Minister-ko didiataha.
“Uni gimin chinga a·dokni Education Minister-ko Meghalaya a·dokni pilak skul aro college-rangon lekka porako nambate on·na gisik nangbatchina, chatro chatrirangni gisepo mande ra·grikaniko rakkichina aro chatro chatrirangna somoi gita scholarship-rangko on·china mol·molenga,” ine Sein Niamtre Ki Khynnah Purea Shillong parakataha.