SHILLONG: Meghalaya a·dokni skanggipa State University, chong·motan Captain Williamson Sangma State University-ko re·baenggipa January-ni 13 tariko, dingtangmancha Kristianrangni bewalo jinma bi·anichi pakwate on·anggen ine a·dokni Education Minister Rakkam A Sangma-ni parakatani ja·man, uni agangipa kattarangko Thma U Rangli-Juki (TUR) dolba raken jegalataha.
Meghalaya a·dokara Kristian a·dok ong·ani gimin a·dokni skanggipa State University-ko Kristianrangni dakbewalo pangchake jinma bi·anichi pakwatanggen ine Education Minister-ni agananiko jegalatengon, “Meghalaya a·doko songdong a·chaenggiparangoni Kristianrang bang·bataiani giminde ia a·dokko Kristian a·dok ine mingna man·ja aro India a·songni niam bidiko pangchake, pilak a·dokrangan darang toromni a·dok ong·jani gimin pilak toromrangkon mande ra·na nangaia. Uni gimin Education Minister Rakkam Sangma-ni agangipa kattarangara, Indian Constitution-o on·gimin niamrangko pe·ani ong·a,” ine TUR parakataha.
Manderangni tangka paisarangchi kuligipa Capt Williamson Sangma State University gita dakgipa institute-rang, darangnan mikkang niteani gri apsan lekka porako on·na man·na gita toromo bak ong·na nangja ineba TUR didiataha.
Meghalaya a·doko Songsarek, Niamtre aro Niam Khasi gita dakgipa bebera·anirangba donga ine janapatskaengon, “Education Minister-ni agangipa kattarangara, Meghalaya a·doko gipin torom aro bebera·anirangko ja·rikgipa manderangni kosako aganani gita ong·a,” ine TUR parakataha.
Gital Parliament building-ko Hindurangni dakbewalo pangchake nokdonggaahani gimin TUR, BJP-chi dilenggipa ma·mong sorkarikoba raken jegalataha.
Gital Parliament building-ko Hindurangni dakbewalo pangchake nokdonggaiahani gimin Meghalaya a·dokoba State University-ko Kristianrangni bewalo a·bachengatskana nangani katta dongja ineba TUR janapataha.