SHILLONG: Re·anggipa Robibar salni bako West Khasi Hills a·jani ning·o donggipa Kynrud songo, Kynrud Presbyterian Church Choir-ni olakkichakram biapona re·angengmitingo, rama a·dramo gari a·sel ong·e sakgni siangna nangaha.
Kynrud songni sordar Clement Nongsiej-ni kobor ra·timgiparangna u·iatani gitade, ia a·sel ong·ani Robibar pring 11:00 bajimango ong·aha, jeon sak 15 manderangko gate re·angenggipa Bolero pik-up gari bolsa, rama apchangket ong·gipa biapko re·engmitingo brake namjani a·sel dondipatna man·jae, Kyllem song ning·o meter 100-mang chugipa a·dramona ga·akonangaha. Indake songni manderang, ia a·sel ong·anio saknaako man·gipa manderangna bakan sanna-bananiko on·na gita sepangbatgipa Kynrud PHC, Mairang Civil Hospital, aro Shillong-ona ra·bana gita dakchaktokaha.
Indake ong·engon, ia obosta ong·chakram biap a·dram-a·kongarigipa ong·anichi, a·selo ga·akgipa manderangko altuae dakchakna gita man·jaomangba songni nokni manderang, walni somoiomangba cha·na ringna gualpile dakchakaniko on·angtokaha.
Kobor on·timgiparangni u·iatani gitade, ia a·sel ong·ani somoio, Kynrud Presbyterian Mondolini choir dol, Mawthadraishan constituency-ni ning·o donggipa Mawdem a·jani Nongrilong Presbyterian gilja noko bak ra·na gita re·angengachim.