TURA: Mongolbar pringo, mande sakgni Tura Bazar-o maiba golmalni a·sel kajia ong·e dinggrikaniona sokaha aro uandaken ja·mano ia mande sakgnioni saksa sakgipinko uni oksiko attechi den·ataha.
Ia a·sel ong·ani Mongolbar pring 11:30 bajimango, Tura Super Market sambao ong·aha aro ia a·sel ong·ako bang·a manderangan mikrontangchi nikenba, ja·mano ia a·sel ong·aniko video ka·e social media-rango watpripraattokaha.
Police-rangni u·iatani gitade, ia a·sel ong·anio jak donggipa mande sakgniara mamasasa ong·achim aro ia a·selni bidingo koborko man·soani ja·man ua biapona re·angon, attechi den·manakosa nikeaiaha.
Dos dakgipa mandeara, Assam South Salmara a·jao donggipa Hajirhat songoni bilsi 24 ong·gipa Minurul Islam ong·a aro den·ako man·gipa mandeara Assam Singimari-oni ong·a indiba da·o ua Tura-ni Rishipara jolo nok para ra·e dongengachim ine police-rang u·iataha.
Dos dakgipa mande aro uni den·gipa atteko police-rang rim·aha aro den·a man·gipa mandeko ta·raken hospital-ona ra·angahaoba ua ramaon janggi galaha ine kobor on·aha.
Mikrontangchi a·sel ong·ako nikgipa manderangni u·iatani gitade, ia mande sakgni maiba golmalni bidingo sakgni jegrikna a·bachengaha aro ja·mano ia sakgnioni saksa, attechi ua sakgipin mandeko uni oksiko den·ataha.
“Tura Bazar-o mande sakgni dakgrikenga ine chinga Mongolbar pring 11:32 bajimango koborko man·soaha aro Tura-ni dolsa police-rang, a·sel ong·gipa biapona sokangon, Minurul Islam minggipa mande, uni mamatang Jaha Uddin-ko attechi den·aha ine nikeaha. Dos dakgipa mandekon bakan police-rang rim·aha aro saknaa man·gipa mandeko Tura Civil Hospital-ona ra·angahachim indiba hospital-ona sokangon ua siaha,” ine Tura-ni police official-rang parakataha.
Ia a·selni bidingo ning·tubate sandirokanirangko dakengkua ineba police-rang u·iataha.