TURA: Meghalaya West Garo Hills, Tirikilla College-o 4th Semester-ko poraienggipa chatri saksa Miss Aijoni Rabha-ko National Youth Festival-ni bak gita Vikshit Bharat Young Dialogue-o Special Attendeee aro Youth Icon-na mikkim-rasongo seoke ua mande ra·ako man·aha. Ia programme-ko New Delhi-ni Bharat Mandapam-o ong·atgen.
Miss Rabha-ko uni ra·chakna kragipa dilgipa ong·ani gunrangko aro chadamberangko namroro-silroroatna kam ka·anirango bimchipe kam ka·aniko ma·sie ra·chakako man·aha. Uni jato lekka-pora skie ra·ani, skia man·aniko bilakbatatna aro songsalni dal·roroanina uni ku·rachake Akhil Bharatiya Vidyarthi Parishad (ABVP) Meghalaya-o Student For Development (SFD)-ni State Convenor ong·e uni kam ka·aniko ma·sibataha.Minggipin SFD-o uni dilgipa ong·anio Miss Rabha Tikrikilla College-ni National Cadet Corps (NCC) unit-o bimchipe kamko ka·gipa saksa ong·aha. Uni NCC-o kam ka·mitingo cholon-bewal, kamo aro a·songko namroroatna uni on·kanganirangko agan-talataha.
Vikshit Bharat Young Leader Dialogue, India-ni namroro-silroroanina songreanirangna chanchigrikna aro kam ka·anina a·song gimikoni chadambe dilgiparangko ku·cholsan ra·bana chu·sokgipa ga·timra ge·sa ong·a. Miss Rabha-ko uni mingnamgipa kamna aro mikkangchi dilgipa ong·na bil gnanggipa ong·aniko niksoe Youth Icon-na seokaha.
Ia national dialogue-o uni bakko ra·ani uni college aro jatna mikkim-rasongko ra·basaan ong·aija indiba uni nikanirangko aro chadamberangko, lekka-porako aro dingtang dingtang jatni daka-rika dakbewalko nambatatna chanchiako aro nikanirangko agana ga·timrako una on·aniba ong·a.
Akhil Bharatiya Vidyarthi Parishad (ABVP), Meghalaya, uko seokanina Miss Aijoni Rabha-na ka·tong-gisik gimik nama-skaniko on·aha. Ia chu·sokani uni rake, on·kange aro songsalni gimin namako dakna ku·rachakanichi ong·aha. National Youth Festival 2025-ni dialogue-na uni kam ka·anirangko ka·angkuchina aro uni chu·sokanirangna chinga una nama-skaniko on·angkuaha.
