WILLIAMNAGAR: Mijal Mongolbar pringwalni bako, East Garo Hills a·jani headquarter Williamnagar jillani dam 11 dokkanrangko wa·al kamaha.
Police-rangni kobor on·ani gitade, wa·al kamani bidingo Mongolbar pringni 5:30 bajimango, manderangni Police Control Room-ona u·iata bakan Fire & Emergency Service-ni dolsa sipairang, wa·alko kimitna re·angahachim indiba wa·alko kimitsrapjae, ia biap donggipa dam 11 dokkanrangko wa·al kamgoptokaha.
Ia wa·al, bijolini a·sel kamahakon ineba police-rang chanchichipenga.
“Wa·al kamgipa biapona Fire & Emergency Service-ni sipairang re·ange, wa·alko kimitna jotton ka·aha aro baditaba kontarangni ja·man wa·alko kimitna man·aha. Ia dokkanrangko wa·al kamanio darangba saknaanirangkode man·jaha,” ine police official-rang janapatenba, ia wa·al kamani chong·mot a·selko aro baditana kingking noksan ong·atako man·ahachim, uko ma·sina gita am·sandianirangko dakengkua ine parakataha.
Wa·al kama man·gipa dokkanrangara, Williamnagar Civil Hospital-ni sambao donggipa dokkanrang ong·achim ineba kobor on·aha.