SHILLONG: Meghalaya a·doko VIP-rang, an·tangtangna on·gimin bilrangko jakkalanichi ramram manderangna neng·nikanirangko on·enga ine matnanganirang batroroengani gimin iandakgipa cholrangko man·aiani gimin skatang bilrangko jakkaljachina aro manderangna neng·nikanirangko ra·bajachina, minister aro uandake dal·dalgipa manderangko a·dokni Chief Minister Conrad K Sangma didiataha.
An·tangtangni naljokanina on·gimin bil aro cholrangko jakkalengon, ramram manderangna neng·nikanirangko ra·baskajachina VIP-rangko Chief Minister didiataha.
VIP-rangna garirango on·enggipa siren, teng·brapgipa light-rang aro uandakgipa cholrangko jakkalni bidingo sorkari da·o nipiltaienga ineba Chief Minister parakataha.
Chief Minister-ni parakatani gitade, iani bidingo nipiltaienba, a·dokni Cabinet-na chu·gimik report-ko on·china Police department-na pakwatmanaha.
Z+ category-na chel·chakaniko on·anide Home Affairs Ministry-ni dongimin niamrang gitasa ong·a ine talataniko on·angengon, iandakgipa bil aro cholrangko jakkalanio ramram manderangna simsakna nangani giminba Sangma aganaha.
“Ramram manderangna maming neng·nikanirangko on·ani grisa VIP-rangna chel·chakanirangko on·na nanga,” ine Chief Minister aganenba, an·tangtangni gadangrangko jakkalsretjachina VIP-rangko didiangaha.
An·tangni songre songgabatengmiting somoirangode ua siren-rangko jakkalrongbreja ineba Sangma, an·tangko mittele aganangaha.
“An·ching pilak biaprangon siren-rangko nanga ong·ja aro nanga kamrangna re·engoba nangani krisa iarangko jakkalna nanga. Biaprangan dongja ong·ode na·a jegitaba siren-rangko gam·atbo, manderang nang·na biap wate on·na man·jawa,” ine Chief Minister aganaha.