SHILLONG: Meghalaya a·doko Human Metapneumovirus (HMPV) sabisini batrikrikaniko champengna aro name nirok sandina man·na gita a·dok sorkari, doctor-rangna training-ko on·na a·bachengengaha.
Health department-ni Principal Secretary Sampath Kumar-ni kobor ra·timgiparangna parakatani gitade, India a·songo HMPV sabisiko man·na a·bachengaha ine koborko man·soani ja·man Severe Acute Respiratory Infection (SARI) aro Influenza-like Illness (ILI) gita dakgipa case-rangkoba sorkari name nitimna a·bachengaha.
Da·o dipet a·doko HMPV-na jajrengna nanganirang dongja ine talataniko on·angengon, saoba sordi-gusu gita dakgipa saaniko man·genchimode an·tangtangna simsakchina aro sabisiko batrikrikna on·jachina ine Kumar didiataha.
HMPV-kode gipin sordi-gusu saanirang gita ra·aichinaba ua a·doko songdongenggipa manderangko didiataha.
Adita salrangna skangsan Assam a·dokni Lakhimpur-o ja 10 ong·gipa bi·sa saksako HMPV man·aha ine parakatahaoba da·o dipet Meghalaya a·dokode HMPV-ko man·giparang saksaba dongskakujaengachim.
Ia bi·sako Dibrugarh-o donggipa Assam Medical College & Hospital (AMCH)-o done sanna bananiko on·enga indiba ia bi·sana da·o maming kenna nangani dongjaha ine doctor-rang parakataha.