TURA: Mingsa aiao inmanbegipa obostao, West Garo Hills a·jani Rajabala constituency ning·o donggipa Gomaijhora songo, Village Employment Council (VEC)-ko dilenggipa mande saksani, PMAY nokna tangka dabiani video-ko manderang nikna man·aha.
Ia Gomaijhora songara Demdema C&RD Block ning·o donggipa song ong·achim aro ia video-o VEC-ni dilgipa mande saksa, PMAY scheme-ni namgniko man·enggipa manderangoniko tangka dabie ra·aniko nikna man·aha.
Ia video-ko Gomaijhora songo PMAY-ni namgniko man·enggipa mande saksani noko ka·ahakon aro ia video-o nikna man·ani gitade, nokdang ge·sako ia PMAY scheme-na segatchina mol·molengon, iana uamang Gram Sevak aro officer saksana tangka giltimenga ine VEC-ko dilgipa aganskaaha.
Biming donggipa pilakan nokrangko man·aigen aro PMAY scheme-ni namgnirangko man·aigen indiba iana tangkarangko gamskana nanga ineba VEC-ni dilgipa aganaha.
“Nokrangkode man·telaigen indiba tangkako Gram Sevak aro officer-rangna on·na gita chinga tangkako gilenga. Chingade tangkakoba bang·e giljaenga maina mitam biaprangode gong 5000/- aro Bhaitbari jolrangode gong 10,000/- ka·e gilenga. Jemangan ia scheme-ni namgnirangko man·kujaenga uamang pilakan man·gen maina ia changode nokrangko bang·en on·ataha,” ine VEC-ni dilgipa aganaha.
Ja·mano ia mandeni, tangka ra·anikoba video-oniko nikna man·aha indiba baditako ua ra·ahachim, ukode ma·siskajaha.
Indake ong·engon, ia block-ni ning·o dingtang dingtang scheme-rangna iandake tangka ra·aniko bang·en nikna man·ronga ine kobor on·timgiparang parakatskaaha.