TURA: West Garo Hills a·jani Rongsai-o donggipa Garo Hills Autonomous District Council (GHADC)-ni Forest Beat office-ko galchipe donengani a·sel maming kamrangko ka·na gita man·jaengaha ine A·chik State People’s Front (ASPF) Pedaldoba sub-unit parakatenba, ia Beat office-o kam ka·giparangko rakkidape aro office-ko gital dake tarienba ia office-ko name chalaichina GHADC-ni Chief Executive Membor (CEM)-ko didiataha.
Iani bidingo GHADC-ni CEM-na sedoatengon, ia Rongsai Forest Beat office-ara Meghalaya aro Assam a·dokni simao donggipa Tikrikilla Police Station-ni ning·o ong·e, Assam aro gipin biaprangona ra·angenggipa bol wa·a aro me·su samjakrangko nitimgipa gita ong·achim indiba da·o ia office-o kam ka·giparang dongjae aro office-ni obostaba namsrangjae, ia Beat house-ko galchipe dona gita ong·aiengaha ine ASPF Pedaldoba sub-unit-ni president parakataha.
“Ia Rongsai Beat office-o kam ka·giparangko rakkidapanichi aro office nokko gital dake tarianichi, Garo Hills-ni ma·manti gam-jinrangko niam gri gipin biaprangona ra·anganiko nambate nirok sandina man·gen aro ian GHADC-na kajinarangko man·e on·skaaniba ong·gen,” ine ASPF Pedaldoba sub-unit-ni president parakatenba, ia Rongsai Forest beat office-o kam ka·giparangko rakkidapchina aro office nokko gital dake tarichina GHADC-ni CEM-ko didiataha.