Sub-centre-rangona drone-rango samrangko watenga

TURA: 2022 bilsio India a·songni skanggipa Drone Delivery Hub aro Network-ko Jengjal Civil Sub-Division Hospital-o a·bachengatani ja·man da·o drone-rango sam aro ma·manti sanna banani bosturangko Garo Hills-ni sub-centre-rangonaba watna a·bachengataha.
Garo Hills-ni diltugipa biaprango manderangna sanna bananirangko on·anio kamrangko ta·rakbatatna aro samrang bon·changani somoirango ta·raken samrangko sokate on·na man·na gita Meghalaya Medical Drugs & Services Limited (MMDSL)-ni ning·o donggipa ia drone delivery network, sub-centre-rangonaba drone gita sam wataniko a·bachengataha.
Koborko on·ani gitade, re·anggipa January 15 aro 17 tarikrangni gisepo, Garo Hills-ni damgittam sub-centre ba jekon da·o Health & Wellness Centre ine mingskaahachim, uandakgipa biaprangona drone-rango sam aro sanna banani ma·manti bosturangko Jengjal Drone Hub-oni watatna man·aha aro ia biaprangara, Boldorenggre, Chidekgre aro Chiading sub-centre-rang ong·a.
Re·baenggipa antirango, Garo Hills-ni gipin sub-centre ba health & wellness centre-rangona sam aro ma·manti bosturangko drone-rangko salange on·kugen ine u·iatengon, iandake drone-rango sam aro sanna banani ma·manti bosturangko chel·gipa biaprangona watanichi sanna banani kamrango dingtanganiko ra·bana man·gnok ine official-rang parakataha.