SHILLONG: 2023 bilsini Assembly election-o gita ia district council election-ode Congress dol, chu·gimik constituency-rango susae gualaniko daktaijawa ine Meghalaya Pradesh Congress Committee (MPCC)-ni president Vincent H Pala parakataha.
“2023 bilsini Assembly election-o chinga (Congress), dam 60 constituency-rango susae dal·bea gualaniko dakaha maina mitam constituency-rangode chingni candidate-rang 500-oni 1000-mangni gita vote-rangkosan man·aiaha. Ian party-na namen kratcha·na nangani ong·aha,” ine ua aganaha.
Re·baenggipa February 21 tariko ong·atenggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-na Congress dol, bilakgipa candidate-rangko seokanio namen simsakbeenga ineba Pala aganaha.
Pala-ni aganani gitade, KHADC election-o Congress dol, Laban-Mawprem constituency-ko wate dam 28 ba dam 29 constituency-rango susana miksongenga aro JHADC-oba dam 29-oni dam 20 constituency-rango susana miksongenga. Bangki seat-rangode Congress dol, candidate-rangko susaatjawa ine Pala, talataniko on·angaha.
KHADC aro JHADC-ni chu·gimik constituency-rango susaaniko Block membor-rang nangniktokjahani gimin Congress dolni dilgiparang, iako tik ka·aha ineba MPCC-ni president parakataha.
“Chingni susaenggipa pilak constituency-rangon chinga bilakgipa candidate-rangko susaatenga inede anga aganjawa maina seat ge·sa ba ge·gniode chinga dakgualainaba gnang. Indiba Assembly election-o dakguala gita ia changode dakgualjana chinga tik ka·aha,” ine ua aganaha.
Ia changode Congress dol, JHADC election-o nambate dakna man·gen ineba Pala, an·tangni ka·dongchakenganiko parakataha.
MDC-rang aro gitcham MDC-rang pilakan election campaign ka·na gita re·ongkattokengaha ineba MPCC-ni president parakataha.