TURA: South Garo Hills a·jani Nongalbibra jolrango namroro silroroaniko ra·bachina didie, Garo Students Union (GSU) Nongalbibra unit, Tura-ni MP Saleng A Sangma-na memorandum-ko on·angaha.
Iani bidingo GSU Nongalbibra unit-ni dilgiparang, Mongolbar salo, Tura-ni MP-ko grongenba, memorandum-ko on·angaha.
Nongalbibra jolrango namroro silroroaniko ra·bachina Tura-ni MP-ko didiatengon, Jakalgittim kal·chakramo mini stadium-ko rikchina aro Nongalbibra-o Multi Facility Centre (MFC)-ko rike on·china mol·molangaha.
Nongalbibra-o GSU nokko rikna gita dakchakanirangko on·chinaba GSU Nongalbibra unit, Tura-ni MP-ko mol·molangaha.
Nongalbibra jolrango sanna banani cholrangko nambatatchina didiangskaengon, Nongalbibra primary health centre (PHC)-ko komibeoba ge 30 palang donggipa hospital dake tarichina GSU Nongalbibra unit, Tura-ni MP-ko mol·molataha.
Nongalbibra jolrango manderangni jelbra jelsusuani batroroengahani gimin manderangko nambate sanna banna man·na gita PHC-o chu·onga gita kam ka·giparangko rakkichinaba GSU Nongalbibra unit, Tura MP-ko didiataha.
