SHILLONG: North Eastern Hill University (NEHU)-o ong·engipa obostarangko nirokatchina gita NEHUNSA, Ma·mongni Education Minister Dharmendra Pradhan-na seataha.
University-o ong·enggipa obostarangni a·sel, university-ni regular Vice-Chancellor chutti ra·dame dongengmiting somoio, saksa a·gipibatsranggipa Professor saksasa, NEHU-ni niam ainrango pangchake Vice Chancellor-ni office-ni pilak kamrangko nirokenga ine NEHUNSA uamangni seatgipa chittio janapataha.
University-ni pilak kamrangko ka·na gita Vice-Chancellor (in-charge)-o bilrang chu·onga gita dongja, jeni a·selan advertise ka·gimin post-rangnaba staff-rangko rakkina man·jaeming pilak kamrangon ja·manchakenga ine janapataha.
NEHUNSA-ni president Dr Wandondor R. Synrem-ni u·iatani gitade, University-o kam ka·gipa Regular staff-rang komiangengaha aro bang·banggipa post-rango ta·rake manderangko gapatjaode NEHU-ko chalaianio namen ja·man chakaniko man·gnok ine chittio janapatenba, University-ni neng·nikanirangko nirokatchina gita ma·mongni Education Minister-ko mol·molataha.
Unomitingo advertise ka·gimino pangchake Non-teaching staff-rangko kamo rakkina gita Vice Chancellor incharge-na dingtangmancha bilko on·china gitaba Association, Ma·mong Minister-ko mol·molataha.
