TURA: West Garo Hills a·jani Tikrikilla samba jolo donggipa Nidanpur songo, dolsa manderang, ‘vaccine gate’-ko kulienba, Assam aro gipin biaprangoniko ra·baenggipa matma mangprakna gong 2000 aro matchu mangprakna gong 1000-ko ra·enga ine kobor on·aha.
Kobor on·timgiparangni u·iatani gitade, ia vaccine gate-ara Animal Husbandry & Veterinary (AH&V) department-ni ning·o ga·akgipa gate ong·a indiba ia gate-o tangka gilenggipa manderang, maming lekkarangkon mesokna jechakskaengachim.
Ia vaccine gate-ko re·anggipa January 20 tarikoni a·bachengaha aro ua somoio ukil saksani dilanichi dolsa manderang, matchu badinggiparangko champengsoenba, department-ni pal uamang tangkarangko gilenga ine aganaha.
AH&V department-ni iandakgipa check point-rangko, matchu matterangko porikka ra·e nina aro tikarangko su·na gita je ramarangoba donade man·aia indiba ia gate-o department-ni manderangba dongja aro ia rama gita ra·baenggipa matchu matterangko porikka ra·e niani ba tika su·e on·anirangba dongja ine matchu badinggiparang parakataha.
“Ia gate-o donggipa mande, Garo Hills-ni dingtang dingtang bazar antirangona ra·baenggipa matchu aro matmarangna tangkarangkosan gile ra·enga indiba maming porikka ra·ani ba tika su·anirangde dongja,” ine matchu badinggiparang aganaha.
Tangka gilna order on·ani lekkako mesokchina aganon, ia gate-o donggipa manderang, maming lekkarangko mesoknaba jechakaiaha indiba uamangko tangka gilna gita bilo ong·enggipa manderangsa bilko on·aha ine aganskaaha ineba matchu badinggiparang parakataha.
Kobor on·ani gitade, iana skangba, ia biaponi km 3-mang chel·ao donggipa Khamari songo ia apsan dakgipa ‘vaccine gate’-ko kulie jasnimangna chalaiahachim. Ia gate-oba matchu badinggipa manderangoniko, tika on·enga ine tangka paisarangko gile ra·ahachim.
“Ia gate-o matchu matterangna tikarangko su·na gita veterinary doctor-ba dongja indiba matchu matterangna tangkarangko gilna gita manderangde bang·en donga. Matchu matterangna sorkarini on·enggipa tikana tangka paisa nangjachim aro ra·genchimoba lekkarang baksasa komikale ra·na nangachim. Ia manderang, matchu badinggiparangoniko niam gri tangka gile ra·enggiparangsa ong·a,” ine matchu badinggipa mande saksa aganaha.