SHILLONG: Meghalaya High Court-ni songgimin Committee, jekon Justice (retired) BP Katakey skotong ong·e dilengachim, South Garo Hills district-o niamgri koela cho·e palatenganiko parakaha.
“Koela badiaba biaponi sokbaenga aro koelarangko bikotenga. Koborrangko man·soani ja·man, koela cha·ue cho·e palenganiko ma·sina gita man·aha aro ia report-ko anga Meghalaya High Court-na on·gen” ine Mongolbar salo obostarangko nipilani ja·mano Justice Katakey aganaha.
A·doko niamgri koela bikotaniko champengchina gita Supreme Court-ni ge·etanirangko ja·rikani bidingo tom·e chanchianiko dakangaha. Indake da·sikkari November jaoni ia bilsi January jaona badita bang·e koelarangko rim·aha, uarangni report-rangko on·china gita district gimikni Deputy Commissioner (DCs)-rangko ge·etataha. Unomitingo bang·bata DC-rangan uamangni ja·jaode koela bikota dongja ine jeattokaha, unomitingo South Garo Hills district-ode janapatgimin ja-rangni gisepo 2,500 metric tons (MT)-na batpilen cha·ue salanggipa koelarangko rim·aha.
Niamgri koel cho·e palani bidingo re·anggipa somoirango kingsni badi ka·ani lekkarangko Committee man·soaha, jerangni bidingo da·o sandianirangko dakenga. Notice-rangkoba on·atmanaha aro jak donggiparangko sing·aniko dakchina gitaba daito gnanggipa department-rangko ge·etataha. South Garo Hills, West Khasi Hills aro East Jaintia Hills district-rangko koela-rangko sriksrik cha·ue cho·enga ine badi ka·anirangko man·soaha ineba ua aganaha.
Badi ka·anio ge·sa video clip-koba watataha, jekon Chief Secretary-na watataha. Uni joljolan iarangni bidingo ja·ku de·china gita saksa Assistant Commissioner-ko ge·etaha, jekon Butbaro report on·china gitaba u·iatahachim.
Sandianirangko dakanio sorkarini jak snilpaanina kusi ong·aniko aganengon, Committee-ni adita de·e mesokanirangko ja·rikkuja ine Justice Katakey aganaha.
