SHILLONG: Meghalaya a·dokni damgittam biaprango niamo pangchake koelarangko bikotna gita Budbar salo, India sorkarini Controller of Coal, minggittam songgigrikanirango soi ka·ahani gimin da·o a·doko scientific mining ba niamo pangchake koela bikotaniko a·bachengna man·gnok.
Iani bidingo jinmana u·iatengon, a·doko niamo pangchake koela bikotaniko a·bachengna soi ka·aniara a·dokna gisik ra·beani sal ong·gnok ine a·dokni Chief Minister Conrad K Sangma parakataha.
“Ku·rachakgimin gitan a·doko niamo pangchake koela bikotaniko a·bachengna chingni sorkari, Coal Ministry baksa nangrime kamrangko ka·aha aro da·alo ia ku·rachakaniko chu·sokgipa ong·atna man·aha,” ine Sangma parakataha.
Chief Minister-ni parakatani gitade, West Khasi Hills a·jani Pyndengshalang, East Jaintia Hills a·jani Saryngkham aro East Jaintia Hills a·jani Lumiakhi-Wahsarang-o niam gita koela bikotaniko a·bachengna India sorkarini Controller of Coal, ia project-rangna songgigrikanio soi ka·aha.
Ia minggittam project-rangna agre, da·o ming 12 dorgastorangba ra·chakna siengaha ine u·iatengon, ia kamrangko ta·raken chu·sokgipa ong·atna gita a·dok sorkari, Mining & Geology Department baksa kamrangko ka·enga ine Chief Minister parakataha.