Union Budget 2025, Meghalaya-ko billion 10 economy sokatna re·mikkanganio dakchakgen

SHILLONG: Ma·mong sorkarini parakatgipa RE 2024-25-ni gita Meghalaya-na on·gipa tax kror 9566.09-oni kror 9870.40-ona baridapaha ine a·dok sorkari Sonibar salo parakaha.
Ia bilsi 2025-26-na cham-gipa B.E kror 10910.14 ong·a, jean RE 2024-25-oni kror 1039.74 kror barida-paha.
Union Budget 2025-o connectivity ba rama ja·lang, healthcare, tourism, industrial development, digital education-ko namdapatna janapaha. Ian Meghalaya-ni development-o mong-songgipa ong·gen. Meghalaya adokko billion 10 economy-ona sokatna nikjumangako chu·sokatna dakchakgipa ong·gen.
Union Budget 2025-ko development-na miksonge tarigipa budget ine janapate State Additional Secretary, Finance, indine aganaha, “ia budget Viksit Bharat-na re·mikkangani ja·lang ong·a. Agriculture, MSMEs, Investments and Export-rangko bilakatgen.
PM Dhan Dhanya Krishi Yojana-ko game cha·giparangna ia budget-o parakataha. Ian ge 100 district-rangona sokgen. A·dokni je district-rangon ge·a-gamanio man·a komia ua district-rang dakchakaniko man·gen. Iasan ong·aija KCC loan limit-ko lak 5-ona bariataha. Jean lak 3-san ong·aiachim. Ian KCC beneficiary-rang-na dakchakgipa ong·gen.
Ma·mong sorkari, dam 120 destination ba gipin dingtang dingtang biaprangko nangdimatna Ude Desh ka Aam Naagrik (UDAN)-ko parakatgen. Union Budget 2025-26-ko parakataon Union Finance Minister, ‘gital taridapgipa scheme, re·baenggipa bilsi 10 somoini gisepo kror 4 passenger ba songregipa-rangna dakchakgipa ong·-gen. Ia scheme, a·brigipa a·dok Meghalaya-na namgipa ong·gen.
Additional Secretary-ni aganani gita, ma·mong sorkari, re·baenggipa bilsi gittamni gisepo gimik district hospital-rango daycare cancer centre-ko rikgen. Ge 200 centre-rangkode ia bilsi 2025-26-ona rikgen. Saksham Anganwadi aro Poshan 2.0 -naba tangka chamako bariataha. Ian cha·ani-ringani chu·ongjae be·en -bimang an·senggijagi-parangna chu·onga gita cha·ani-ringanirangko on·gen. Ian Meghalaya-ni ECD Mission baksa bakrime, mikkangchini bi·sarangna nambata cholrangko on·gen.
A·songo, a·dok sorkarirang baksa bakrime ge 50 tourist destination site-ko rikgen ba tarigen. A·dok, infrastructure-na a·ako on·gen, iaba mingsa Meghalaya-ni tourism sector-ko bilakatna miksong-aniko chu·sokatgen ine Additional Secretary aganaha.
MSME-ni credit guarantee cover-ko kror 5-oni kror 10-ona bariatania, chadambe aro entrepreneur-rangna dakchakgipa ong·gen.
Iarangni gisepon ma·mong sorkari, National Cooperative Development Corporation (NCDC)-ko namdapatna dakchakgen. Braodband connectivity-ko gimik sorkarini secondary aro primary school-rangona sokataniara bi·sarangna digital learning -o dakchakgen. Ian Meghalay a·dokni education sector-ko nam-dapatgen. Meghalaya education sector-o namen ja·manchakenga.