NEW DELHI: Meghalaya a·doko, mongsongbate Khasi aro Jaintia Hills a·jarango dingtang dingtang dolrang, niam gri napsrukanirangna kenchake, rel gari ra·baaniko jegaltokengon, rel project-rangko ra·chakchina ia dolrangko aro manderangko didianide a·dok sorkarini daitoan ong·a ine Sombar salo, Union Railways Minister Ashwini Vaishnaw aganaha.
“Indita tangka paisani project-ko chu·sokataniara ma·mong aro a·dok sorkari dolgnini daitoan ong·a indiba a·dokni manderangko aro dingtang dingtang dolrangko didianide a·dok sorkarini daitoan ong·a,” ine Union Minister, a·brini a·dokrango rel ramarangko tariani bidingo kobor ra·timgipa manderangna talate on·angani somoio aganaha.
Rel project-ko Meghalaya a·dokni manderang ra·chakna man·jaenga ong·ode ia project-ko Union Railways Ministry den·galpilna tik ka·angaha ine adita salrangna skangsa, New Delhi-o Union Railway Minister Ashwini Vaishnaw-ko gronge agangrikani ja·man, Meghalaya a·dokni Chief Minister Conrad K Sangma parakatahachim.
“Angni miksonganiko ua ma·sichakaha indiba ua bakan angna chitti seatgen ine aganaha. Ia rel project-ko chu·sokattelna man·jagenchimode, 2017 bilsimangonin a·ani korosrangna deputy commissioner-o donenggipa gong kror 200 tangkarangko ma·mong sorkari bi·atpilaignok aro ia rel project-ko den·galpilaignok,” ine ua aganaha.
A·dokni Chief Minister baksa agangrikaniko talate on·angskaengon, ia rel project-ko ru·uta bilsirangonin chu·sokatchipna man·jaengani gimin iako ta·raken matchotatchina ua Chief Minister-ko didiataha ine Union Minister aganskaaha.
Badita somoiko ma·mong sorkari on·na miksongkuenga ine sing·anina aganchakaniko on·angskaengon, da·o dipet ia project-na Union Ministry somoirangko donkujaenga indiba kamrangko somoi gitan matchotatna nanga ine Vaishnaw aganaha.
Meghalaya a·dokna ma·mong sorkarini ra·baenggipa rel project minggniara, km 22 ong·gipa Tetelia-Byrnihat line aro km 108 ong·gipa Byrnihat-Shillong line ong·achim. Gong kror 496 ong·gipa Tetelia-Byrnihat project-koba Khasi Hills-ni NGO-rang, niam gri napsrukbagiparangna kenchakenba, tarina on·chipkujaengachim.
“Ia gong krorni kror ong·gipa aro a·dokna dingtanganiko ra·bana man·gipa railway project-ko a·doko chu·sokatna man·jaenga ong·ode den·galpilna nangaigen ine ua (Minister) raken aganaha,” ine adita salrangna skangsan, a·dokni Chief Minister Conrad K Sangma parakatahachim.
Chief Minister-ni aganani gitade, ia project-ni bidingo a·dokni manderang aro dingtang dingtang dolrang baksa chanchirimna somoiko bi·dapon, Union Minister somoikode name aganatjaha indiba bakan una chittiko seatgen inesa aganataiaha. Nanggenchimode ua (Minister) an·tangan a·dokona re·bae rel garirangni gamchatani bidingo a·dokni manderang baksa chanchirimnaba gnang ine Sangma aganaha.
Meghalaya a·doko, mongsongbate Khasi Hills jolrango dingtang dingtang dolrang, niam gri napsrukgiparangna kenchaksoenba, rel gari ra·napbaaniko raken jegaltokengachim ine nikna man·a.
Rel garirangko ra·bana skang niam gri napsrukaniko champengna Inner Line Permit (ILP) gita bilakgipa niamrangko ra·gatchengchina NGO-rang dabitokengachim.
