SHILLONG: Meghalaya a·doko March jani gisepon, Jal Jeevan Mission (JJM)-ni ning·o chu·gimik 100 percent nokdangrangna chi pipe sale on·aniko matchotatna Meghalaya sorkari rakbee kamrangko ka·engaha.
JJM-ni kamrangko ia 2025 bilsini March jaon matchotatna gita a·dok sorkari nisanko donahachim aro sorkarini mesokani gitade da·o dipet JJM-ni ning·o chi pipe-rangko sale on·ani 81.63 percent gapengahachim.
JJM dashboard-o parakani gitade, Meghalaya a·doko JJM-ni kamrangko a·bachengataoni da·o dipet 6,50,914 nokdangrangoni 5,27,630 nokdangrangna chi pipe-rangko sale on·na man·aha.
JJM-ni ning·o da·o dipet darang a·jarangon chu·gimik 100 percent kamko matchotatna man·kujaenga ineba dashboard-o parakaha. Indake ong·genchimoba bang·bata a·jarangon chi pipe-rangko man·ani 80 percent-de badeskaaha.
JJM dashboard-ni gitade, da·o dipet chi pipe-rangko soke man·ani, South Garo Hills a·jao 90.82 percent ong·e bang·batgipa ong·enga, aro East Jaintia Hills a·jao 65.48 percent-san ong·e komibatgipa ong·skaenga.
Meghalaya a·doko gimik dam 6,457 songrangoni dam 4,068 songrangde chu·gimik 100 percent nokdangrang chi pipe-rangko man·aha aro dam 2,378 songrango kamrangko ka·engkua ineba JJM dashboard-o parakaha.
Meghalaya a·doko JJM-ni kamrangna gimik gong kror 1.059 tangkarangko ku·rachakaha aro ianoni da·o dipet gong kror 514 koros ong·e, gong kror 587 tangkarang bangki dongkuenga.
2019 bilsio ra·gatgipa Jal Jeevan Mission (JJM) programara, 2024 bilsini gisepon songadam nokadamrango donggipa nokdang ge·antinan Functional Household Tap Connection (FHTC)-ko on·na a·bachengatgipa program ong·achim ine nikna man·a.
JJM-ni dashboard-o kamrang chu·sokenga ine a·kangengoba, bang·a songrangon JJM-ni chirangko man·kujaenga ine badi ka·anirangko bang·en nikna man·skaengachim.
