SHILLONG: Meghalaya a·doko niam gri koelarangko bikotenga aro salruraenga ine matnanganirangko man·engani gimin NPP-chi dilenggipa MDA sorkario bak ong·paenggipa United Democratic Party (UDP), apsan bakrimenggipa dolskarango sing·sandina manchiangaha.
“Da·o dipet ia pilakan matnanganirangsan ong·engkuani gimin ia matnanganirangara kakket ong·ama ong·ja uko talbate ma·sina gita chinga apsan chanchirimna nangenga,” ine a·dokni Cabinet Minister aro UDP-ni dilgipa Paul Lyngdoh aganaha.
A·dokni dingtang dingtang biaprango, mongsongbate South Garo Hills a·jani koela a·damrango niam gri koelarangko bikotenga aro salruraenga ine matnanganirangko Justice (Retd) BP Katakey committee-ba sandirokanirangko dakon, a·doko niam gri koelarangko bikotenga ine matnanganiranga kakket ong·a ine nikna man·ahachim.
“Iani bidingo chinga MDA-o bakrimenggipa dolskarang baksa agangrikchongmotgen maina iandake matnanganirangara kraani ong·ja aro chinga kakketko ma·sina nangchongmota,” ine Lyngdoh aganaha.
A·doko niam gri koela bikotanirangna mingsni badi ka·anirangko da·o sandirokengaha ine iana skang, Justice Katakey-ba agane, iani bidingo matnanga man·gipa manderangna u·iatanirangko on·manaha ineba parakatahachim.
Bangladesh a·songona bol 100-150 truck garirango niam gri koelarangko salangenga ine video baksa badi ka·gipani gimin janapatskaengon, iani bidingo inquiry-ko dakchina ua, SGH-ni Deputy Commissioner aro Superintendent of Police (SP)-na ge·etaniko on·manaha ine Justice Katakey parakatskaaha.
“Ia matnanganio anga an·tangde maming kakket ong·aniko nikjaha. Indita truck garirango koelarangko salna gitade Customs official-rangba on·jawachimkon,” ine ua aganaha.
