Sak 64,000-na baten chatro chatrirang porikkako seenga
TURA: Meghalaya Board of School Education (MBOSE)-ni Secondary School Leaving Certificate (SSLC) porikkako da·al Sombar sal dipet a·dokni dingtang dingtang centre-rango a·bachengatengaha aro ia chang SSLC porikkako gimik sak 64,387 chatro chatrirang seenga.
Ia SSLC porikkako a·dok gimikni dam 164 centre-rango seenga aro ia centre-rangoni dam 93-de Khasi-Jaintia Hills jolrango aro dam 71-de Garo Hills-o ong·enga.
Ia bilsi SSLC porikkako seenggipa sak 64,387 candidate-rangoni sak 26,526-de me·asarang aro sak 37,861-de me·chikrang ong·enga.
Ia sak 64,387 candidate-rangoni sak 29,973-de Regular-I, sak 16,028-de Regular-II, sak 1455-de Private, sak 1884-de Non-Regular, sak 21-de Improvement aro sak 15,026-de Compartmental category-o ong·enga.
Ia SSLC porikkani skanggipa subject English ong·enga aro uni ja·man February-ni 12 tariko Indian Language ba Additional English ong·gen. February 14 tariko Health and Physical Education, Computer Science, ba Vocational Subject-rangko ra·angskagen aro uni ja·man February 17 tariko Social Science subject-ko ra·skagen. February 19 tariko Science & Technology subject-ko ra·gen aro February-ni 21 tariko Mathematics ba Special Mathematics-ko ra·chote ia SSLC porikkako matchotatgen.
Porikka sechakgipa hall-rangko pring 9:30 bajio kuligen aro porikkako pring 10:00 bajio a·bachenge attamn 1:00 bajio matchotatgen.
Indake ong·genchimoba, Vocational Subject-rangnade theory examination-ko pring 10:00 bajioni pring 11:00 bajiona kontasasan ong·ataigen.