SHILLONG: Meghalaya a·dokni mitam sorkari skulrango skigiparang, an·tangtangni biapo gipinrangko kam ka·atskaenga ine matnanganirangko man·ahani gimin iandake an·tangtangni biapo sakgipinko kam ka·atskaenggipa skigiparangna a·dokni Education Minister Rakkam A Sangma, mikrakataniko on·ataha.
“Badiaba skulrango skigiparang, an·tangtangni pal sakgipinko kam ka·atskaenga ine badi ka·anirangko man·genchimode chinga iandakgipa skigiparangni kosako rakgipa ja·kurangko de·gen. Na·simang skigipani kamna dorgasto galaha ong·ode skigipa ong·e kamko ka·china,” ine Sombar salo Sangma, kobor ra·timgiparangna aganaha.
Apsan daken skulko chalaienggipa aro dilgiparangnaba ua mikrakataniko on·angaha.
“Skulko chalaidilenggiparangnaba sorkari mikrakataniko on·enga, skigiparang sakgipinko skulrango skiatskaenga ong·ode na·simangni kosako rakgipa ja·kurangko de·gen. Teachers Information Management System (TIMS)-ko ra·gatani ja·mande, skulko chalaienggiparangan iana dai nanggiparang ong·gen,” ine Education Minister aganaha.
Skigiparang, an·tangtangni biapo sakgipinrangko kam ka·atskana bil dongja ineba Education Minister parakataha.
Mitam skulrangode skigiparang chu·ongjani gimin skulrang an·tangtangni koroschin skigiparangko rakkidapaha ineba Sangma aganaha.
“Indiba skigipani biapo sakgipinko rakkiskae kam ka·atanide niamni a·palo ong·a,” ine ua talataniko on·angaha.
Iandakgipa kamrangko ka·jachina skigiparangko didiatengon, “Na·simang maiba kam nangchongmota donga ong·ode niamo pangchake chuttiko ra·na man·a indiba an·tangni biapo sakgipinko skulrango skina on·anide niamni a·palo ong·a,” ine Education Minister parakataha.
