AMPATI: Koch-rangni Chilarai (Sukhladhwaj Koch)-ni chang 515-gipa atchiani salko maniani bak gita Budbar salo Chilarai Divas-ko, South West Garo Hills a·jani Dumnigaon songo maniangaha aro ia program-ko Meghalaya Koch Students Union (MKSU) ong·ataha.
Koch-rangni raja Nara Narayan-ni jonggipa Chilarai, 1510 bilsio Sukhladwaj ine atchiaha aro ua saksa ka·donggipa mande ong·e, Kochrangni singhasonko apalbatatanio uan mongsonggipa ong·ahachim.
Indake ong·engon, ia chang 515-gipa Chilarai Divas-ko Dumnigaon songni Gaonbura Jalaram Koch aro MKSU-ni president Kandarpa Koch, chakkiko so·enba a·bachengataha.
Ia salko manianio, Koch jatni chrok mesaani, git ring·ani aro uandakgipa dingtang dingtang program-rangkoba nikangna gita man·aha.
Ia manianio dongpae bak ra·anggipa gipin manderangara, Meghalaya Koch Association-ni general secretary Jayanta Koch, gitcham general secretary Kamaleswar Koch, MKA-ni assistant general secretary Janardan Koch, Krorang Mathop (Koch Literature Society)-ni president Nirmal Koch aro gipinrang ong·a.