TURA: Budbar saloni a·bachenge salgittamna New Tura-o donggipa Matchakolgre LP School kal·chakramo ong·atenggipa Tura Industrial Fair 4.0-ko West Garo Hills a·jani Additional Deputy Commissioner aro DRDA-ni Project Director Jude RT Sangma a·bachengate on·angaha.
Ia District Level Industrial Exhibition-ko bilsiantian District Commerce & Industries Centre (DCIC), jolo bading chiwalgiparangko tang·doatna aro uamangni bosturangko pala sim·anio dakchakna gita ong·atrongengachim.
Ia Industrial Fair-ko a·bachengatanio Sangma, tom·anio bak ra·giparangna aganprakangengon, ia Industrial Fair-o bak ra·enggipa manderangna an·tangni chakpaani aro ka·dongataniko on·angenba, ia program-o jakni kamrangko changgipa sapgipa manderang baksa bak ra·pana man·ahani gimin an·tangni kusi ong·aniko parakangaha.
Iandakgipa program-rangara, jakni kamrangko changgipa sapgipa manderangna, an·tangtangni change sapanirangko mesoknasan ong·aigija an·tangtangna janggi tangani cholrangko dake ra·na cholrangba ong·a ineba Sangma aganaha.
Ia Industrial Fair-ko ong·atenganina District Commerce & Industries Centre-ko mittelpilangengon, jakni kamrangko changgipa sapgipa manderangni namdapatangkuchina ua didianiko on·angaha.
Meghalaya a·doko aro mongsongbate Garo Hills-o iandake chonchongipa karkanarangni on·gilanirangko janapatengon, iandakgipa karkanarangba a·dok sorkarini 10 billion economy ong·na niksamsoanio bang·en on·gilanirangko dakenga ine Sangma parakataha.
Ia tom·anio, West Garo Hills DCIC-ni General Manager Don Felicent R Marak-ba jinmana aganprakangengon, Annual District Level Industrial Exhibition-ko da·o Tura Industrial Fair ine mingsreskaenba, industry-rangko aro karkanarangko tang·doatna bilsiantian ong·atenga ine parakataha.
Ia Industrial Fair-ko ong·atanio, jolni bading chiwalgiparang baksana dingtang dingtang department-rang, jekai Agriculture, Horticulture, Animal Husbandry & Veterinary, Sericulture & Weaving, Fishery, Community of Home Science aro uandakgipa department-rangba bakko ra·e ma·manti bosturangko mesokna aro palna sim·na gita donenga.
Ia salgittamna ong·atenggipa Tura Industrial Fair-o Meghalaya Grassroots Music Program (MGMP) aro Kids Zone-koba ong·atenga.