SHILLONG: Niam gri koela bikotanio jak donga ine dingtang dingtang dolrangni matnanganiko National People’s Party (NPP)-chi dilenggipa MDA 2.0 sorkari jegalataha.
Niam gri koela badinggiparang aro koela bikotenggipa manderang baksa jak donga ine matnanganiko jegalatengon, niam gri koela bikotenggipa manderangni kosako rakgipa ja·kurangko de·na man·na gita banoba niam gri koela bikotanirangko nikenga ong·ode sorkarina u·iatna nanga ineba NPP aganaha.
“Niam gri kam ka·enggipa manderang baksa maini gimin sorkari jak on·pagen? Iandake niam gri kam ka·enggipa manderangna sorkari dakchake on·enga ine na·simang chanchiama? Indake ong·ja,” ine a·dokni Cabinet Minister aro MDA-ni ku·wattimgipa Marcuise N Marak aganaha.
Niam gri koela bikotenggipa aro salruraenggipa manderang, bilo ong·enggipa manderang baksa jak dongna nanga ine adita salrangna skangsan, opposition Voice of the People’s Party (VPP) matnangatahachim.
Iandake matnanganirangko jegalatengon, “MDA sorkario maming dongnuani dongja aro na·simangba iako nikenggnok. Sorkarini kamrangko nambatatna gita a·dokni Chief Minister Conrad K Sangma, dingtang dingtang kamrangko a·bachengate on·aha,” ine Marak aganaha.
A·doko niam gri koela bikotani kamrang dongja ine jegalattaiengon, “Niam gri ka·enggipa kamrangko na·simenga nikenga ong·ode sorkarina u·iatna nanga. Iandakgipa kamrangko bon·atna chinga donga,” ine NPP-ni dilgipa aganaha.
South Garo Hills a·jao niam gri koelarangko bikotengkua ine Justice BP Katakey committee-ni sandie man·aniko 27-gipa interim report-o parakgipani bidingo janapatskaengon, “Niam gri koela bikotenga ine agananiara kakket ong·ja. Niam gri koela bikotanirang dongenga ong·ode uarangko sandina dongimin niamrang donga,” ine Marak aganaha.
Ian Justice Katakey committee-ni sandiroke tarigipa report-sa ong·a ine mesoke on·angskaon, “Iani giminde anga ma·sija indiba batanggimin somoirango koela bikotgipa manderang pilakan da·o Williamnagar aro gipin biaprango dongtokengaha. Uamang scientific mining-ko dakna gita licence-na senge dongtokenga,” ine Marak aganaha.
Ia report-ko Justice Katakey committee, ma·sisrete ba ong·gija kobor on·giparangonikosa knae tariahakon ineba ua aganaha.
 |
ReplyForward
|