Ampati: Ampati Degree College, Sonibar salo silver jubilee-ko ga·subee cultural programko ong·ate maniaha. Department of Education-ni Lecturer Eligious Sengbat G. Momin-chi bi·aniko dake programko a·bachengaha, uni joljol Principal Dr. Mamunur R. M. Willy rimchaksaoni kattarangko aganaha.
South West Garo Hills-ni Deputy Commissioner Hema Nayak, programo mongsonggipa sokgipa ong·e bakko ra·angaon institution-ni iandakgipa chu·sokgipa gadangona sokanina de·mittelaha.
Indake DC Nayak, student-rangna career counseling-ko nangnikani bidingo janape mikkangchi chadamberangko dilna gita dingtangmancha cell-ko bikotchina agan-ku·pattiaha. Indake poraigiparangko digital learning ba skie ra·anirangko dakchina didiaha.
Governing body-ni Secretary Clement G Momin, tom·anio aganprakmitingo college-ni a·bachengbaani giin aro college-ko rikanio baditan aro maidakgipa neng·nikarangko chagrongahachim iarangni gimin aganaha. Ia college dongkujamitingo jolni manderang, chubata gadango poraidapna Tura aro Shillong-ona re·na nangaiachim, indiba tangka paisani gita neng·nikgipa nokdangrangna ian bilongen rakgipa ong·a, indiba Ampati Degree College-ko kuliatani gimin jolni manderangna bilongen dakchakani ong·aha.
Ampati Degree College-ni itihasko niatna:
Adita bilsirang skangan South West Garo Hills-o higher education-na nikjumangako a·bachengaha. Bilsi 1980 aro 1995-ni somoio adita jotton ka·ahachim indiba tangka paisa aro kam ka·gipa manderang chu·ongjani a·sel college-ko rikna man·jaha. Indiba bilsi 2000 February jani 15 tariko Ampati-oni Lt. Nolledhy S. Daring, Lasker-ni dilanio college-ko a·bachengaha.
A·bachengode class-rangkon Chengkompara-ni A·king Nokma Crening D. Sangma-ni nokosa ra·aha uni ja·man ka·sinsin Smt. Agnish G. Sangma-ni on·gipa a·ao temporary biapona jitaha. Ampati-ona wenangao P.A Sangma sagi, college-ko rike on·na ku·rachakaha, MPLAD scheme-oniko 5,00,000 tangkako college building-ko rikna on·aha. Unbaksana jaanti 35,000 grand-in-aid-ko on·na ku·chakaha.
Adita neng·nikarangko chagronganiko man·genchimoba institution-ni campus-ko 8.2 acre-ni biapo rikaha, jekon bilsi 2008-o gitcham MP Agatha K. Sangma nokdonggae on·aha. Insitution-ni higher education-o on·gilaniko nike Meghalaya sorkari, bilsi 2020-o ‘People’s College Grant-in-Aid Scheme’-o napataha.
Uandake da·ode Ampati Degree College, jolo mingsiniggipa institution ong·skaha, Arts stream-o sak 550 student-rangna seat ba biap donga. College-o mingchet honors subject-rang donga- English, Garo, Assamese, History, Political Science, Economics, Philosophy aro Education. Ian North Eastern Hill University (NEHU) baksa nangdimgipa ong·a.
College-o sak 23 lecturer-rang donga aro sakchet non-teaching staff donga. Indake college, uamangni academic program-rangko a·palbatatna jotton ka·enga. Ampati jolnasan ong·aija gipin biaponi student-rangna namgipa education-ko on·enga.
