SHILLONG: Education system-ko namdapatna aro Meghalaya-o school-rang bang·dugaani gimin uarangko komiatna miksonganio a·dok sorkari, school clustering model-ko ra·gatna tik ka·aha. Meja Sukrobar salo Education Department-ni review meeting ba tom·anio iako tik ka·aha.
Education Department-ni Secretary Swapnil Tembe, indine aganaha, ‘apsan school-ni dingtang dingtang section-rangko dingtangrike chalaia indiba uarang ge·sa institution-nin ong·a indake chalaigipa bang·en school-rang donga. Ua school ge·sa ong·genchimoba dingtang ge·bri school dake chanskaa- uan LP, UP, Secondary aro Higher Secondary. Uni gimin ua schoolrangko nangdimatna tik ka·aha, maina uarang ge·sa entity-o ga·aka. School-rangko nangdimataniara a·doko school bang·dugaaniko komiatgen ine Tembe aganaha.
Meghalaya chonbegipa a·dok ong·genchimoba Meghalaya-o ge 14,500 school-rang donga.
A·doko school bang·ani a·selba poraigiparang uamangni academic-o komibeoba chang·bride school-ko bodola, iarangni a·selba dropout rate baria. Indiba ia gital model education-ko namdapatgen.
Uandake ia model-ko ra·gatna skang officialr-ang dingtang dingtang school-rangona wene data-ko chimonge sorkarina report-ko on·gen.
Minggipin Meghalaya-o ge 500 unrecognised school-rang donga, uarango sorkarioni ra·chakani dongja. Indiba ma·mong sorkarini ge·etani gita a·dok sorkari, ua institution-rangko nirokanggen.
Education officer-rangko school-rangona re·roroe inspection ka·china ba sandianiko dakchina ge·etaha. School-o chu·onga gita skigiparang dongama dongja, lekka ki·taprang, uniforms aro gipin bosturang dongama dongja iarangko sandigen. Chimonggipa report-ko ba data-ko school-ni monitoring app-o dongen.
Minggipin a·dokni education-ko namdapatna Meghalaya School Education Act, 1981-koba nipiltaina tik ka·aha.
