SHILLONG: Jatrangko bak dakna jotton ka·gipa party-rangkode, da·o February 21 tariko ong·atnasienggipa Khasi Hills Autonomous District Council (KHADC) aro Jaintia Hills Autonomous District Council (JHADC) election-rango jegalsrangaichina gita National People’s Party (NPP) national president Chief Minister Conrad K Sangma, puonasienggipa voter-rangko didiaha.
“Manderangko bak dakatna jotton ka·gipa party-rangna aganchakna gita ia election-an manderangna namgipa chol ong·gen. Bak dakatgipa politics-ni kosakode an·ching bilakgen chadengna nanggen aro an·chingko bak dakatna miksonggipa dolrangkode jegalsrangna nanga” ine NPP padot, Conrad Sangma mejalo Mawsynram constituency-ni Dangar-o election campaign ka·mitingo aganaha.
Pa Sangma, NPP candidate Alvin Sawkmie-na chakpaenba Cherrakata, Pataghat, aro Mawsynram-o election rally-rangko ka·angaha.
India-Bangladesh sima-ario ru·uta bilsirangna galchipe donenggipa neng·nikanirangko Sorkari nikaha aro uarangko chu·sokatna gita man·engaha aroba a·jolo songdonggipa manderangna namroro-silroroaniko ra·bana gita ja·kurangko de·engaha ine Pa Sangma aganaha. “Balat-Dangar-Ryngku ramako tarina gita chingni ku·rachakgiminko ching chu·sokataha, jekon chinga batanggimin election-o ku·rachakahachim,’’ ua rasong chae aganaha.
Ku·rachakgiminrangko NPP Sorkarini chu·sokatgiminrangkoba Chief Minister jinmana de·e pinnikaha.
