SHILLONG: Khasi aro Jaintia Hills a·jarangona rel gari ra·bana jotton ka·engani gimin Khasi Students Union (KSU) jegalatenba, iani bidingo ma·mong sorkarina mikrakataniko on·angaha.
Khasi aro Jaintia Hills a·jarangona rel gari ra·baaniko dingtang dingtang dolrang jegaltokengoba, rel project-rangko ra·bana jotton ka·engani gimin KSU-ni president Lambokstarwell Marngar, ma·mong sorkari aro Northeast Railway Frontier (NFR)-ko matnangataha.
Dingtang dingtang dolrangni jegalaniko manigija ma·mong sorkari, Khasi aro Jaintia Hills a·jarangona rel garirangko ra·bana jotton ka·angkua ong·ode rakgipa ja·kurangko de·e jegalangskagen ineba ua mikrakataniko on·angaha.
Khasi aro Jaintia Hills a·jarangona rel ramarangko taribana jotton ka·a ong·ode ramarango jingjengatanirangko dakchina gitaba KSU president, Khasi aro Jaintia Hills-ni KSU unit-rangko didiataha.
“Chinga a·bachengonin tale u·iatmanahaoba chingni dabianirangna ma·mong sorkari nachil songjaenga. Uni gimin chingni dabianiko knachakgija rel ramarangko taribana jotton ka·a ong·ode chinga jingjengatanirangko dakna draatako man·gen,” ine Marngar mikrakataniko on·angaha.
Jaintia Hills-ona gital rel ramako tarina gita KSU, NFR-na survey ka·na on·jawa ineba KSU president parakataha.
2017 bilsion Byrnihat-ni Ronghana-ona rel rama taribana miksonganiko KSU jegalaha ine gisik ra·atpilaniko on·angengon, Meghalaya a·dokni salaram jolrangona ma·mong aro a·dok sorkarirang, rel ramarangko taribana jotton ka·angkua ong·ode KSU jegalangkuaigen ine Marngar aganaha.
2017 bilsini May jao, Tetelia-Byrnihat rel project-ko KSU-ni jegalani somoio, jegalenggipa dolrang aro police-rangni gisepo dinggrikanirang ong·kate so·sojengjeng ong·angahachim ine nikna man·a. Ia so·sojengjeng ong·anio jegalenggipa dolrang, rel rama tarienggipa company-ni bosturangko nosto ka·e galani ja·man, kamko ka·enggipa contractor-rang kamko dontongate re·pilangtokahachim.
Indake ong·engon, Assam a·dokni Nagaon a·jao donggipa Chaparmukh-oni Jowai-ona NFR, gital rel ramako tarina miksongenga ine koborko man·soani ja·man KSU, iani bidingo raken jegalanirangko dakangtaiaha.
Koborko man·soani gitade, Assam a·doko donggipa Chaparmukh junction-oni Meghalaya a·dokni Jowai-ona kilometer 180 ong·gipa rel ramako tarianiba salgro salaram a·dokrango rel ramarangko namdapatanio mongsonggipa bak ong·enga.
Ia rel ramara, mongsonggipa biaprang, jekai Bhoksong, Rajagaon, Baithalangso, Jengkha, Kherani, aro Umrangso-ko nappakenba Jowai-o bon·egen.
Kobor on·timgiparangni u·iatani gitade, ia rel ramaan, Assam aro Meghalaya a·dokni gisepo re·a doani cholrangko namdapatanio mingsa mongsonggipa ramaba ong·genchim.
 |
ReplyForward
|
