SHILLONG: Adita salrangna skang ong·atanggipa Khasi Hills Autonomous District Council (KHADC) election-ni result-ko Sombar salo parakatanio Voice of the People’s Party (VPP), KHADC-ni gimik dam 29 seat-rangoni dam 17 seat-rangko chena man·ahani gimin ia chang KHADC-ni Executive Committee (EC)-ko VPP chalaiskagnok.
Iani bidingo kobor ra·timgipa manderang baksa agangrikengon, “Election-o chinga dingtang dingtang ra·biani aro neng·nikanirangko chagrongna nangahaoba KHADC election-o chegipa ong·na man·ahani gimin anga bilongen kusi ong·a. Ia election-o chingko Rangbah Shnong-rangni kosako aro media-ni kosako ong·gija daka ine matnangtokahaoba aro chinga tangka paisani bilrangko warachakna nangahaoba manderang ching baksa ong·ahani gimin chinga manderangko mittelpilna ska. Chinga maming dakeba rangbah shnong ba media-ni kosako chakatgipa dol ong·ja indiba rongtale chalaigipa sorkarikosa ong·atna nangnikaia. Ia election-o chu·sokgipa ong·na man·ahani gimin chinga Nokgipa Isolko aro chingna pu·ongipa pilak manderangkon mittelpilna ska. Ian a·bachenganisan ong·kuenga,” ine VPP-ni president Ardent Miller Basaiawmoit aganaha.
Ia chang KHADC-ni EC-ko VPP, gipin dolrang baksa bakrimna nanggijan doltangari chalaigen ineba Basaiawmoit parakataha.
“Chinga chu·onga gitan seat-rangko cheahani gimin doltangari kamko ka·aigen. Gipinrang EC-na chakpaaniko on·na sikgenchimode chakpaaniko on·na man·aigen indiba election-ni ja·man chinga darang party baksaba bakrimani dongjawa,” ine VPP president aganaha.
Jaintia Hills Autonomous District Council (JHADC) election-ode VPP, dam 9 seat-rangkosan chena man·skaaiaha aro iani bidingo janapatengon, somoi ong·ahaon uamang nangani kri ja·kuko de·angaigen ine Basaiawmoit parakataha.
“JHADC-oba chinga gipin party-rang baksa bakrimna nangnikjaenga. Chinga party-ni dilgiparang apsan chanchienba nangani kri ja·kuko de·angaigen,” ine ua aganaha.
Jaintia Hills-o agre bil-jakrangko jakkale susaahani a·sel VPP-na nangchakeaniko ra·baaha ineba VPP-ni president, dingtang dingtang party-rangko matnangataha.
“Jaintia Hills-ni bang·a songrangon bil-jakrangko jakkalengani a·sel manderang, jakgitele dilgiparangko seokna man·jaenga aro iani a·selsa JHADC-o chinga dal·batsranggipa party ong·e chu·sokna man·jaha. KHADC-o gita jakgitele aro nama bewalo election-ko ong·ata ong·ode JHADC-oba chingan chegopaigenchim,” ine Basaiawmoit aganaha.