SHILLONG: Adita salrangna skang matchotanggipa District Council election-o Voice of the People’s Party (VPP)-ni vote man·ani lak 3.71-ona tang·onangaha indiba National People’s Party (NPP)-ni vote man·ani lak 2.80-chi batangskaaha ine Mongolbar salo, NPP-ni national general secretary aro a·dokni deputy chief minister Sniawbhalang Dhar a·kangataha.
“2024 bilsini Lok Sabha election-o VPP, Khasi aro Jaintia Hills a·jani ning·o donggipa dam 36 Assembly constituency-rangoniko gimik lak 5 vote-rangko man·ahachim indiba ia district council election-ode lak 3.71 vote-rangkosan man·aiaha. Iani ortode, ja 8 ba ja 9-ni gisepon VPP-ni vote man·ani ta·raken komiangaha aro 2028 bilsiode haida uamangni vote man·ani 80 percent-chi komiangnaba dongaha,” ine Dhar, kobor ra·timgipa manderang baksa agangrikengmiting somoio aganaha.
Ia district council election-o NPP-ni vote man·ani lak 2.80-ona batangskaaha ineba Dhar a·kangataha.
“NPP aro VPP-ni vote man·anio dingtanggrikani, batanggimin MP election-ode lak 3 ong·achim indiba ia changde 85,000-san ong·aiaha,” ine NPP-ni general secretary aganaha.
Jaintia Hills Autonomous District Council (JHADC) election-ode NPP, dam 13 seat-rangko chena man·enba, UDP-ni sakgittam aro Independent candidate sakgni baksa bakrime, gital Executive Committee-ko chalaina tik ka·aha indiba Khasi Hills Autonomous District Council (KHADC) election-ode VPP, dam 17 seat-rangko chegope, NPP-de dambri seat-rangkosan man·rikskaaiahachim.
JHADC election-o NPP-na pu·onanichi seat-rangko bang·bate man·na dakchakahani gimin Jaintia Hills a·jani manderangko mittelpilangengon, “Ia chang election-o NPP, 50-60 percent-na baten nambataha. KHADC election-oba chinga seat dambrikode chena man·ahani gimin chinga Khasi Hills a·jani manderangkoba mittelpilna ska,” ine Dhar aganaha.
Jaintia Hills-o bil-jakrango aro tangka paisani bilrangko jakkalesa chegipa ong·aha ine VPP-ni president Ardent M Basaiawmoit-ni matnanggipa kattarangko jegalatskaengon, Sombar attamo Narwan songo, gitcham dilgipani nokko nosto ka·e galanian VPP-ni bil-jak jakkalaniko mesokani ong·a ine Dhar parakatskaaha.
“Election-o bil-jak jakkalani dongja indiba manderang jakgitelen an·tangtangni pu·onani bilrangko jakkalna man·aha. Chinga seat dam 13-ko cheaiahani gimin chinga bil-jakrangko jakkala ia katta ong·ja. Kakketko aganode, VPP-ni manderangan, Sombar attamo Narwan songo Rangbah Shnong-ni nokko nosto ka·e galanichi bil jak jakkalaniko mesokaha. KHADC-o uamang (VPP) dam 17 seat-rangko cheahani gimin chinga uamangkoba bil-jak jakkale chea ine aganboma? Indake ong·ja, chingade manderangni namnike seokaniko mande ra·a,” ine a·dokni Deputy Chief Minister Sniawbhalang Dhar aganaha.
MDA-ni gita janapatskaengon, KHADC-o uamang dam 12 seat-rangko aro JHADC-o dam 18 seat-rangko cheahani gimin nambatroroenga ine Dhar parakataha.
 |
ReplyForward
|