SHILLONG: Meghalaya a·dokona niam gri napsrukanirangna kenchaksoenba Khasi aro Jaintia Hills a·jaona rel gari ra·napbaaniko KSU aro dingtang dingtang dolrang jegaltokengon, rel garirangko nangnikama nangnikja uade jolo songdongenggipa manderangosa ong·na nanga aro darangba iani bidingo champengna man·ja ine a·dokni Cabinet Minister Kyrmen Shylla, Jaintia Hills-ona rel gari ra·napbaaniko jegalengani gimin aganaha.
Cabinet Minister Kyrmen Shylla-ra Jaintia Hills a·jani MLA-ba ong·a aro uni aganani gitade, rel garirangko ra·baani bidingo joltangni manderangsa an·tangtangni nangnikaniko aganna bil donga aro gipin biaprangonide darangba champengna bil dongja.
Assam a·dokni Chaparmukh-oni Jaintia Hills a·jao donggipa Jowai-ona Northeast Railway Frontier (NFR), rel ramako taribana miksongengani gimin Cabinet Minister Kyrmen Shylla, ia kattarangko aganaha.
Shylla-ni parakatani gitade, Jaintia Hills a·jao songdongenggipa manderangoni bang·batan bading chiwale cha·giparang ong·a aro rel garirangko ra·baani bidingo chanchina a·jao songdongenggipa manderangnan pakwate on·na nangenga.
Rel ramarangko taribaani bidingo a·jao songdongenggipa manderang baksa chanchirimna a·bachengaha ineba Jaintia Hills-ni Cabinet Minister Kyrmen Shylla parakataha.