Rel garirangko ra·baanichi kamrangko on·na man·gen: MoS
SHILLONG: Meghalaya a·dokona rel garirangko ra·baanichi chadamberangna janggi tangani cholrangko on·na man·gen aro a·doko namroro silroroaniko ra·bana man·gen ine a·dokona rel gari ra·baaniko ra·chakchina gita DoNER-ni Union Minister of State (MoS) Sukanta Majumdar, a·dokni dingtang dingtang dolrangko didiangaha.
A·dokona niam gri napsrukanirangna kenchakenba KSU aro uandakgipa dingtang dingtang dolrang, Khasi aro Jaintia Hills jolrangona rel rama taribaaniko raken jegalsotokengachim ine nikna man·a.
Rel gari ra·baaniko ra·chakchina dingtang dingtang dolrangko didiatskaengon, “Rel ramarangko ra·bajagenchimode namroro silroroaniko ra·bana man·jawa. Meghalaya a·doko skia pora man·gipa chadamberang bang·en donga aro ia chadamberangna an·ching kamrangko on·na nangenga. Kamrangko man·e on·na gitade an·chingna dingtang dingtang karkanarangkoba nanga,” ine Majumdar aganaha.
Dingtang dingtang a·dokrangko rel ramarangchi nangdimatenba a·songni Prime Minister Narendra Modi, bang·en namroro silroroaniko ra·bana man·aha ine janapatskaengon, “Je a·dokoba namroro silroroaniko man·na gitade rel ramarangko nanga,” ine Minister of State aganaha.
Indake ong·engon, Byrnihat-oni Shillong-ona rel rama taribaaniko a·doko ra·chakjaengani gimin aro dingtang dingtang dolrang jegaltokengani gimin ia project-na chamatgipa gong kror 270 tangkarangko ma·mong sorkari bi·atpilengaha ine a·dokni Chief Minister Conrad K Sangma parakatskaaha.
Ia project-na chamatgipa tangkarangko on·atpilchina ma·mong sorkarini seatgipa chittiko a·dok sorkari man·soaha ineba Sangma parakataha.
“Tangkarangko ma·mong sorkarioni bi·atpilengahani gimin ia project-ko chipna nangaignok aro Shillong-ona rel garirangko ra·bana man·jawaha,” ine Chief Minister aganaha.
Dingtang dingtang dolrang jegaltokengani gimin Byrnihat-Shillong rel project, 2016-2017 bilsirangonin bon·chipengahachim ine nikna man·a.
Jaintia Hills-ni Khliehriat-ona rel ramako tarina gita proposal dongachim ine janapatskaengon, iandakgipa project-rangara manderangni namgninasa ong·ani gimin sorkari, manderangni nangnikani gitasa kamko ka·aigen ine Sangma aganaha.
A·dokna rel garirangko nanggenchimoba rel project-rangko jegalenggipa dingtang dingtang dolrangni nangnikanikoba sorkari mande ra·skaa ineba ua aganaha.
Manderang nangnikgenchimosa East Jaintia Hills a·jaona rel rama taribana miksonganiko sorkari name nigen ine janapatengon, iani bidingo sorkari, manderang baksa public hearing-ko ong·atna chanchienga ine Chief Minister parakataha.
Da·o dipet Mendipathar-onasan rel ramako taribakuengani gimin Garo Hills-ni ning·tubata biaprangona rel ramarangko taribaani bidingo sing·on, manderangni gisepo nangnikanirang donggenchimosa sorkari, iani giminba cholrangko nina man·aigen ine Chief Minister parakataha.