Ia bilsio a·dokni GSPDP kr 59 ong·e 11.6% bataha: Guv
SHILLONG: Sukrobar salo, Meghalaya Legislative Assembly-ni Budget Session-ko a·bachengatanio, a·dokni Governor CH Vijayashankar, Assembly-ni membor-rangna aganprakangaha aro Assembly-o ua aganprakengon, ia bilsio a·dokni GSPDP gong kror 59,228 ong·ahani gimin batanggimin bilsiona 11.6 percent-ni bataha ine parakataha.
Ia bilsio Primary sector-o 16.6 percent, secondary sector-o 10.7 percent aro tertiary sector-o 10 percent-chi tang·doaniko nikna man·aha ineba ua aganaha.
Meghalaya a·doko financial inclusion-ko namdapatna a·dok sorkari rakbee kamko ka·enga ine janapatengon, lak 8.5-na baten Pradhan Mantri Jan Dhan Yojana account-rangko kuliaha ine a·dokni Governor parakataha.
MUDRA (PMMY) loan-ni ning·o gong kror 186-mangni gita tangka paisarangko chamataha aro ian sak 14,000-na baten manderangna namgni ong·aha ineba Vijayashankar aganaha.
Lekka porani bidingo janapatskaengon, Meghalaya a·dokni pilak a·jarangon Class IX-oni Ph.D level-ona sorkari, central aro state scholarship scheme-rangko ra·gate on·enga ine Governor parakataha.
A·doko pilakni gitan namroro silroroaniko ra·bana sorkari on·kange kamko ka·enga ine janapatengon, batanggimin bilsini gisepo ia sorkari, CM CONNECT aro Hello Meghalaya gita dakgipa program-rangko ra·gatanichi a·doko dingtanganiko ra·bana man·aha ine a·dokni Governor aganaha.
A·dok sorkarini ra·gatgipa program-rangni bidingo janapatengon, rama jal·lang, bijoli, gama ge·ani, chirangko ripingani aro tourism-ni kamrango a·dok sorkari, externally aided project (EAP)-rangko jako ra·e ka·enga aro ia project-rangna World Bank, International Fund for Agricultural Development, New Development Bank, Japan International Cooperation Agency aro Asian Development Bank gita dakgipa gipin a·songni kamrangchi dakchake on·enga ine Governor aganaha.
A·dokni manderangna an·seng baljokaniko on·na gita sorkari kamrangko ka·enga ine janapangengon, an·o donggipa ma·giparang aro bi·sa bakgitchakrangni sianiko komiatna gita sorkari, Chief Minister’s Safe Motherhood Scheme (CM-SMS)-ko 2022 bilsio a·bachengataha aro ia scheme-ko a·bachengatanichi an·o donggipa ma·giparangko aro bi·sa bakgitchakrangko nambate nirok sandina man·enga ine Governor parakataha.
PM-ABHIM-ni ning·o dam 151 sub-centre-rangko rike manderangna an·seng baljokaniko on·na kam ka·enga ineba Governor aganaha.
2023-24 bilsini gisepo a·bachengatgipa gital niamrang, chong·motan Bharatiya Nagrik Suraksha Sanhita, Bharatiya Nyaya Sanhita, aro Bharatiya Sakshya Adhiniyam-ni bidingo janapatengon, a·doko ia gital niamrangko ra·gatahaoba Autonomous District Council court-rangkode Sixth Schedule-o pangchaken chalaiangkugen ine Governor parakataha.
Ia bilsini gisepo mongsonggipa rama tariani project-rangko a·bachengatna man·aha ine janapatskaengon, Shillong-Dawki Highway aro Tura-Dalu project-rang da·o matchotangengaha ine Governor aganaha.