TURA: South Garo Hills a·jani Chokpot sub-division ning·o donggipa Bandari Government SSA skul nok namsrangjahani a·sel poraienggipa bi·sarang aro kam ka·enggiparangba neng·nikanirangko chagrongna nangtokenga ine Simsanggre-ni Niksamso Garo Community Organisation (NGCO) parakatenba, ia skul nokko ta·raken taripile on·china Education department-ko didiataha.
NGCO-ni u·iatani gitade, ia skul nokni bidingo jolo songdongenggipa manderangni badi ka·aniko man·soenba uamang an·tangtangan ia skul nokko nina re·angaha aro ia skul nokni obosta namsrangjaha ine nikna man·aha.
Ia skulo poraienggipa chatro chatrirang aro skigiparangni namgnina ia skul nokko ta·raken taripile on·china Education department-ko didiatengon, Garo Hills-ni bang·a biaprangon iandake skul nokrang namjahani a·sel galchipe donako nikna man·enga ine Garo Hills-o nosto ong·e dongenggipa pilak skul nokrangkon taripile on·china NGCO mol·molataha.
“Garo Hills-ni ning·tugipa songrango donggipa bang·a Govt. LP aro SSA skulrangan department-ni nirok simsakgijani a·sel nosto ong·e galchipako man·a nangao ga·akenga. Una agreba, skulo skigipa head mistress ba head master-rang, ia skul nokrangni bidingo, department-na u·iatjaengani a·sel iandakgipa obostarangko chagrongna nangenga,” ine NGCO parakataha.
Songadam nokadamrango donggipa skulrangko Education official-rang, bilsio changprakde nirokena nanga ine janapatengon, Garo Hills-ni bang·a biaprangon skul nokrang namjani a·selo skulo poraienggipa bi·sarang neng·nikanirangko chagrongna nangenga, mongsongbate wachini somoirango skul nokrang namjani a·sel bi·sarang porikkarangko sena man·jae poraianiko dontongna nangao ga·akenga aro songni daldrobaenggipa bi·sarang namen ja·manchakaniko man·enga,” ine NGCO-ni dilgiparang suk ong·gijaniko parakataha.
