TURA: Meghalaya a·dokni deficit skulrango skigiparang aro kam ka·enggiparang, re·anggipa January aro February jagnini dormahako man·kujaengani a·sel neng·nikanirangko chagrongna nangtokenga ine Garo Hills Deficit School Teachers’ & Employees’ Association (GHDSTEA) parakataha.
GHDSTEA-ni parakatani gitade, iani bidingo uamang Meghalaya a·dokni Education Minister aro School Education & Literacy-ni Director-naba u·iatmanahachim indiba da·alonan skigiparangni neng·nikanirangko namatna gita sorkari maming ja·kurangko de·kujaengachim.
“Deficit skulrango skigiparangna aro kam ka·giparangna jagnini dormaharangko on·kujaengani a·selan skigiparang, nokdangtangtangko chalaianio neng·nikanirangko chagrongna nangtokengaha. Mitam skigiparang, jaantian nok para, bijolini bill aro dingtang dingtang korosrangna tangka paisarangko nangpaa indiba somoi gita dormaharangko man·tokjaengani a·sel neng·nikanirangko chagrongna nangtokengaha,” ine GHDSTEA-ni dilgiparang parakataha.
Deficit skulrango skigiparang bang·batakon, MBOSE porikkani answer paper-rangko nipilna aro dingtang dingtang kamrangnaba jakkalenga indiba skigiparangna dormaharangkode somoi gita on·skajaenga ineba GHDSTEA parakataha.
“Skigiparangna dormahako somoi gita on·jaenganiara skigiparangni janggi tanganiosan neng·nikanirangko ra·baenga ong·ja indiba lekka porako on·anioba nangchakeaniko ra·baenga. Skigiparangan bida budiko on·anio janggil bolgro gita ong·a indiba skigiparangna somoi gita dormahako on·janiara lekka pora on·ani kamrangko sorkarini gamchatnikgijaniko mesokani gita ong·enga,” ine GHDSTEA-ni dilgiparang parakataha.