TURA: Meghalaya a·doko Khasi ku·sik baksana Garo ku·sikkoba official language dake ra·gatchina didie Tura-ni social activist Cherian G Momin, a·dokni Chief Minister Conrad K Sangma-na sedoataha.
Khasi ku·sikko a·dokni official language dake ra·china a·dokni Tourism Minister Paul Lyngdoh proposal-ko on·angani ja·man Garo ku·sikkoba official language dake ra·gatchina Momin, Chief Minister-na sedoataha.
Khasi ku·sikko official language dake ra·gataniara jatni daka rikanirangko ripinganio mingsa nambegipa ja·ku de·ani ong·gen ine janapatengon, apsan daken Garorangni daka rikanirangkoba ripinge rakkianio Garo ku·sikkoba official language dake ra·gatna nangenga ine Momin, Chief Minister-na sedoatgipa chittio janapataha.
1972 bilsio Meghalaya a·dokko bikotaniara, Khasi, Garo aro Jaintia jatrangni ku·mong nangrimanio pangchakesa ong·aha ine janapatskaengon, ian a·doko songdongenggipa pilak Tribal jatrangna apsan bak rengsiko on·na miksongani ong·a ine Momin parakataha.
Garo ku·sikko official language dake ra·gatgija Khasi ku·sikmangmangko official language dake ra·gataigenchimode a·doko songdongenggipa dingtang dingtang Tribal jatrangni gisepo meligrikgijaniko ra·baani ong·gen ineba Momin, mikrakataniko on·angaha.
Meghalaya a·dokko man·dile on·anggipa pagitchamrangni niksamsoaniko mande ra·enba, a·doko dingtang dingtang jatrangni ku·mong nangrimaniko mangrakbatatchina gitaba Momin didiataha.
Garo ku·sikko official language dake ra·gatchina dabianio GHADC, Nokmarang, dingtang dingtang dolrang aro Garo Hills-o songdongenggipa manderangkoba ku·cholsan ong·e bakrimchina gitaba ua didiataha.
